کراچی کے علاقے نیو کراچی ایوب گوٹھ میں ایک رہائشی عمارت میں نصب گیس پریشر مشین اچانک پھٹنے سے زور دار دھماکہ ہوا، جس کے نتیجے میں ایک دکاندار جاں بحق جبکہ چھ افراد زخمی ہو گئے۔ دھماکہ اتنا شدید تھا کہ دو مکانات اور چار دکانیں مکمل طور پر تباہ ہو گئیں، جبکہ آس پاس کی عمارتوں کو بھی نقصان پہنچا۔
عینی شاہدین کے مطابق، دھماکے کی آواز کئی کلومیٹر دور تک سنی گئی، اور علاقے میں خوف و ہراس پھیل گیا۔ دھماکے کے بعد متعدد افراد ملبے تلے دب گئے، جنہیں مقامی افراد اور ریسکیو ٹیموں نے بروقت کارروائی کرتے ہوئے باہر نکالا۔
ریسکیو اہلکاروں نے ملبے سے ایک دکاندار کی لاش نکالی، جب کہ زخمیوں میں رہائشی اور راہگیر دونوں شامل ہیں۔ زخمیوں کو فوری طور پر قریبی اسپتال منتقل کر دیا گیا، جہاں ان کا علاج جاری ہے۔
ابتدائی تحقیقات کے مطابق، حادثہ ایک گیس پریشر بڑھانے والی موٹر کے پھٹنے سے پیش آیا۔ پولیس کا کہنا ہے کہ جائے وقوعہ سے ایسی مشین برآمد ہوئی ہے جو سوئی گیس کا پریشر مصنوعی طور پر بڑھانے کے لیے استعمال کی جاتی تھی۔ خدشہ ظاہر کیا جا رہا ہے کہ مشین کے ذریعے گیس کھینچی جا رہی تھی جو گھر کے اندر بھر گئی، اور کسی چنگاری سے دھماکہ ہو گیا۔
حادثے کے وقت مکان میں مزدور رہائش پذیر تھے، جب کہ گھر کے مالکان وہاں موجود نہیں تھے۔ قریبی مکانات کو بھی دھماکے سے جزوی نقصان پہنچا۔
پولیس اور بم ڈسپوزل اسکواڈ نے جائے وقوعہ کا معائنہ کر کے تحقیقات شروع کر دی ہیں۔ حکام کے مطابق واقعے کی مکمل رپورٹ جلد تیار کی جائے گی تاکہ مستقبل میں ایسے افسوسناک حادثات سے بچا جا سکے۔