خطے میں امن کی ایک بڑی امید، پاکستان اور افغانستان کے درمیان سیز فائر معاہدہ طے پا گیا ہے۔ اس بات کی تصدیق وزیر دفاع خواجہ محمد آصف نے کی ہے۔ ان کا کہنا ہے کہ دونوں ہمسایہ ممالک نے باہمی احترام اور سرزمین کے استعمال سے متعلق اصولوں پر اتفاق کر لیا ہے۔
خواجہ آصف نے سماجی رابطے کی ویب سائٹ ‘ایکس پر اپنے پیغام میں بتایاکہ پاکستان اور افغانستان کے مابین سیز فائر کا معاہدہ ہو چکا ہے۔ افغانستان سے پاکستان کی سرزمین پر ہونے والی دہشت گرد کارروائیاں فوری طور پر بند ہوں گی۔
انہوں نے مزید کہا کہ دونوں ممالک نے اس بات پر اتفاق کیا ہے کہ وہ ایک دوسرے کی سرحدوں کا احترام کریں گے، اور مسائل کو پرامن طریقے سے حل کرنے کے لیے رابطہ جاری رکھیں گے۔ اسی سلسلے میں 25 اکتوبر کو استنبول میں ایک اور اہم ملاقات متوقع ہے جہاں تفصیلی امور پر بات چیت ہو گی۔
خواجہ آصف نے اس کامیاب پیش رفت پر قطر اور ترکیہ کا خصوصی شکریہ ادا کرتے ہوئے کہا کہ دونوں برادر ممالک نے ثالثی کا کردار ادا کر کے ایک ممکنہ بحران کو امن کے راستے پر ڈال دیا۔
قبل ازیں قطر کی وزارت خارجہ نے بھی ایک بیان میں تصدیق کی کہ دوحہ میں پاکستان اور افغانستان کے نمائندوں کے درمیان مذاکرات ہوئے، جن میںفوری جنگ بندی اور دیرپا امن کے قیام پر اتفاق ہوا۔یہ معاہدہ نہ صرف دونوں ممالک کے درمیان کشیدگی کم کرنے کی طرف ایک مثبت قدم ہے، بلکہ پورے خطے میں امن و استحکام کی امید کو تقویت دیتا ہے۔