وزیراعلیٰ پنجاب مریم نواز نے بس میں خاتون کو ہراساں کرنے والے پٹرولنگ پولیس اہلکار کی گرفتاری کے بعد اس کی تصویر سوشل میڈیا پر شیئر کرتے ہوئے سخت الفاظ میں کہا ہے کہ ہراساں کرنے کے واقعات کے لیے زیرو ٹالرینس ہوگا۔
حال ہی میں ایک ویڈیو سوشل میڈیا پر وائرل ہوئی، جس میں دیکھا جا سکتا تھا کہ سرگودھا کے نارووال چوک مریدکے پر ایک ہائی وے پٹرولنگ کا اہلکار بس میں اگلی سیٹ پر بیٹھی خاتون کو ہراساں کر رہا ہے۔ ویڈیو میں پولیس اہلکار کے اس عمل کے دوران خاتون کے علاوہ ایک نقاب پوش خاتون بھی دکھائی دیتی ہے جو پریشان نظر آ رہی تھی۔
ویڈیو سامنے آنے کے بعد متعلقہ اداروں نے فوری کارروائی کرتے ہوئے مذکورہ اہلکار کو گرفتار کر لیا ہے اور وہ اب حراست میں ہے۔
مریم نواز نے اپنے سوشل میڈیا پیغام میں اہلکار کی تصویر کے ساتھ لکھا،’’اس شخص کو گرفتار کر لیا گیا ہے۔ ہراساں کرنے کے واقعات کے لیے ہمارا صفر برداشت کا موقف ہے۔
یہ واقعہ اس بات کا واضح پیغام ہے کہ کسی بھی قسم کی ہراسانی کو برداشت نہیں کیا جائے گا، اور ذمہ دار افراد کے خلاف سخت کارروائی کی جائے گی۔