ممبئی (نیوز ڈیسک )بالی وڈ اداکارہ امریتا راؤ نے انکشاف کیا ہے کہ انہوں نے فلمی کیریئر کو بچانے کیلئے اپنی شادی کو دو سال تک دنیا سے چھپایا۔

بھارتی میڈیا کے مطابق امریتا راؤ اور شوہر آر جے انمول اپنے نئے یوٹیوب شو ‘کپل آف تِھنگز’ میں اپنی شادی سے متعلق باتیں کررہے تھے۔

رپورٹس کے مطابق شو کی تازہ ترین قسط میں، جوڑے نے انکشاف کیا کہ انہوں نے در حقیقت 2014 میں خفیہ طور پر شادی کی تھی۔

امریتا نے بتایا کہ 2013 میں جب انمول نے ان سے شادی کرنے کے لیے کہا تو وہ اس کے لیے تیار نہیں تھیں کیونکہ اس سے ان کے کیریئر کو نقصان پہنچ سکتا تھا۔

تاہم انمول نے انہیں مشورہ دیا کہ اگر ہم 4،5 سال سے اپنے رشتے کو چھپارہے ہیں تو کیوں نہ ہم خفیہ شادی کرلیں اور اس کو بھی دنیا کے سامنے ظاہر نہ کریں۔

اداکارہ نے کہا کہ انمول کا یہ مشورہ سن کر میں نے فوراً شادی کیلئے ہاں کردی۔

بھارتی میڈیا کے مطابق امریتا نے مزید بتایا کہ ہم نے شادی کی خفیہ تقریب منعقد کی جس میں ہمارے خاندان کے بہت سے افراد بھی شریک نہیں تھے۔

پروگرام کے آخر میں جوڑے نے بتایا کہ ان کی شادی 15 مئی 2014 کو ہوئی تھی لیکن اس کا اعلان ہم نے 2016 میں کیا تھا۔

یاد رہے کہ 2020 میں ان کے ہاں بیٹے کی پیدائش ہوئی تھی۔

واضح رہے کہ اس سے قبل گزشتہ امریتا راؤ نے شادی اور بچے کی پیدائش کے بعد اپنے کیریئر میں پیش آنے والی مشکلات کے بارے میں بھی بات کی تھی۔