سینئر اداکارہ ثانیہ سعید نے ساتھی اداکارہ صائمہ قریشی کے اس بیان پر جو انہوں نے دیا تھا کہ عورت کی کمائی میں برکت نہیں ہوتی، اپنی رائے کا اظہار کیا ہے۔ ثانیہ کا کہنا ہے کہ مردوں کی کمائی میں بھی برکت نہیں ہوتی اور ان کے پیسے بھی اکثر ضائع ہو جاتے ہیں۔
صائمہ قریشی نے ستمبر 2025 میں دوبارہ کہا تھا کہ عورت کا کام کمائی کرنا نہیں ہے اور عورت کی کمائی میں برکت نہیں ہوتی۔ اس پر ثانیہ سعید نے ’ایف ایچ ایم پوڈکاسٹ‘ میں کہا کہ پہلے یہ سمجھنا ضروری ہے کہ صائمہ قریشی کے نزدیک “برکت” کا کیا مطلب ہے۔
ثانیہ کے مطابق عورت کی کمائی میں برکت نہ ہونے کا دعویٰ درست نہیں کیونکہ صائمہ قریشی کی اپنی کمائی میں برکت ہے۔ ان کا کاروبار اچھا چل رہا ہے، وہ بچوں کی اچھی تربیت کر رہی ہیں، صحت مند ہیں اور اپنے پیسوں سے اپنی مرضی کے مطابق فیصلے کر سکتی ہیں۔ یہی سب کچھ بڑی برکت ہے۔
ثانیہ نے کہا کہ شاید صائمہ قریشی کا اصل مطلب عورت کی زندگی میں مرد کے حقیقی ساتھ کی کمی ہے، کیونکہ عورت کو بھی مرد کا ساتھ اور سہارا چاہیے۔ اگر یہ ساتھ نہ ملے تو کمائی میں برکت محسوس نہیں ہوتی۔
انہوں نے مزید بتایا کہ مردوں کی کمائی میں بھی برکت نہیں ہوتی کیونکہ وہ بھی سرمایہ کاری میں نقصان اٹھاتے ہیں اور اپنے پیسے ضائع کر بیٹھتے ہیں۔
ثانیہ نے کہا کہ عورت کی کمائی میں برکت نہ ہونے کا احساس اکثر اس وقت آتا ہے جب شوہر یا مرد شریک حیات عورت کی کمائی پر قابض ہو جائیں یا ان پر ظلم و زیادتی کریں۔ بہت سے مرد اپنی بیویوں کی کمائی کھا جاتے ہیں اور ان پر تشدد بھی کرتے ہیں۔
انہوں نے کہا کہ تاریخی طور پر مالی معاملات مردوں کے کنٹرول میں رہے ہیں، اس لیے بعض خواتین کو یہ محسوس ہوتا ہے کہ ان کی کمائی میں برکت نہیں۔ لیکن ثانیہ کا کہنا ہے کہ صائمہ قریشی کی کمائی میں برکت ہے اور وہ خود مختار عورت ہیں جو اپنے پیسوں سے اپنی زندگی آسانی سے گزار سکتی ہیں۔