اسلام آباد ہائی کورٹ نے نیشنل انرجی ایفیشنسی اینڈ کنزرویشن اتھارٹی (نیکا) کے ڈائریکٹر ایس ایم او صبیح حیدر کی تعیناتی غیر قانونی قرار دے دی ہے اور کہا ہے کہ ڈائریکٹر اسٹریٹیجی مینجمنٹ آفس (SMO) کے عہدے کی تخلیق بھی غیر قانونی تھی۔
جسٹس بابر ستار نے سینئر اسسٹنٹ ڈائریکٹر نیکا محمد ساجد حسین کی درخواست پر فیصلہ جاری کیا، جس میں ادارے کے ڈائریکٹر کی تعیناتی کو چیلنج کیا گیا تھا۔ عدالت نے کہا کہ ایس ایم او کے عہدے کی تخلیق اور اس پر کی گئی تقرری قانون کے مطابق نہیں تھی۔
عدالت نے ہدایت کی کہ نیکا بورڈ جائزہ لے کہ یہ ترمیمی ریگولیشنز بغیر بورڈ کی منظوری کے سرکاری گزٹ میں کیسے شائع ہوئیں۔ مزید کہا گیا کہ نیکا بورڈ کو ان غیر منظور شدہ ترامیم کی اشاعت کی ذمہ داری اٹھانی ہوگی۔
عدالت نے فیصلے کی کاپی چیئرمین نیکا بورڈ کو بھجوانے کی بھی ہدایت کی ہے تاکہ ادارے میں قانونی تقاضوں کے مطابق اقدامات کیے جا سکیں۔