راولپنڈی کے علاقے صادق آباد میں افسوسناک واقعہ پیش آیا، جہاں ایک نجی اسکول کے استاد نے محض کتاب نہ لانے پر طالبعلم کو بدترین تشدد کا نشانہ بنا ڈالا۔ تشدد کے نتیجے میں نویں جماعت کے طالبعلم احمد رضا کا بازو ٹوٹ گیا۔ پولیس نے بچے کے والد کی درخواست پر مقدمہ درج کر کے ملزم استاد کو گرفتار کر لیا ہے۔
متاثرہ طالبعلم کے والد کے مطابق، احمد رضا کو استاد قاری طفیل نے دو گائیڈز خریدنے کے لیے کہا تھا۔ ایک گائیڈ تو بازار سے مل گئی، مگر دوسری مارکیٹ میں دستیاب نہ ہونے کے باعث وہ نہ خرید سکا۔ اگلے روز جب احمد اسکول گیا تو پہلے ہی پیریڈ میں قاری طفیل نے کتاب مانگی، جس پر احمد نے مؤدبانہ انداز میں بتایا کہ کتاب مارکیٹ سے شارٹ ہے اور چند دن میں مل جائے گی۔
یہ بات سن کر استاد طیش میں آ گیا اور ڈنڈے برسانے لگا۔ بچے کے بازو پر شدید ضربیں لگنے سے ہڈی ٹوٹ گئی۔ احمد گھر آیا تو والدین نے جب اس کا بازو دیکھا تو فوراً بے نظیر اسپتال لے گئے، جہاں ایکسرے کے بعد تصدیق ہوئی کہ بازو ٹوٹ چکا ہے۔
پولیس کے مطابق واقعے کی اطلاع ملتے ہی فوری کارروائی کی گئی۔ تھانہ صادق آباد میں مقدمہ درج کر کے ملزم استاد قاری طفیل کو گرفتار کر لیا گیا۔ پولیس ترجمان کا کہنا ہے کہ “بچوں پر تشدد کسی صورت برداشت نہیں کیا جا سکتا۔ یہ بچے اس قوم کا مستقبل ہیں، اور ان کی حفاظت ہم سب کی مشترکہ ذمہ داری ہے۔”
اس واقعے نے نہ صرف والدین بلکہ تعلیمی حلقوں میں بھی تشویش کی لہر دوڑا دی ہے۔ ماہرین تعلیم کا کہنا ہے کہ جسمانی سزا کسی طور تربیت کا ذریعہ نہیں، بلکہ یہ بچوں کے اعتماد اور ذہنی نشوونما کے لیے نقصان دہ ہے۔