لاہور(نیوزڈیسک) ہائیکورٹ میں کاہنہ کے علاقہ سے خاتون کے مبینہ اغوا کے کیس پر سماعت ہوئی جس دوران عدالت نے پولیس اہلکار کی جانب سے خاتون کی تصاویر ٹک ٹاک اکاونٹ پر لگانے پر برہمی کا اظہار کیا ۔
چیف جسٹس لاہور ہائیکورٹ جسٹس عالیہ نیلم نے کیس کی سماعت کی ، دوران سماعت عدالت نے درخواست گزار کے وکیل سےاستفسار کیا کہ والدین نےبچوں کا اندراج نادرا میں کیوں نہیں کروایا ، اگر نادرا میں بچوں کا ریکارڈ موجود ہوتا تو کہیں نہ کہیں سے ٹریس ہوجاتے ۔ دوران سماعت ڈی آئی جی انوسٹی گیشن نے انکشاف کیا کہ خاتون کی تصاویر ٹک ٹاک اکاونٹ پر ملیں ، تفتیش پر پتہ چلا کہ ڈی ایس پی کے گن مین نے وہ اکاونٹ بنایا۔
اس پر چیف جسٹس نے اظہار برہمی کیا اور استفسار کیا کہ کیا آپ لوگوں کا ریکارڈ محفوظ نہیں ہے؟ کیا حساس ریکارڈ ہر ایک کی رسائی میں ہوتا ہے؟ چیف جسٹس مس عالیہ نیلم نے اظہار برہمی کرتے ہوئے ڈی آئی جی انوسٹی گیشن کو حکم دیا کہ سارے کیس کی فائل کورٹ کے حوالے کریں ۔ کیس کی ساری فائل دیکھ کر پھر تاریخ دیں گے۔ عدالت نے کیس کی سماعت غیر معینہ مدت تک کیلئے ملتوی کردی ۔
