ایپل کے پہلے فولڈ ایبل آئی فون کی رونمائی اب زیادہ دور نہیں۔ رپورٹس کے مطابق یہ ڈیوائس ایک سال سے بھی کم وقت میں سامنے آسکتی ہے، اور اس کی سب سے بڑی خاصیت یہ ہوگی کہ اس کی اسکرین پر کوئی کریز (fold line) نظر نہیں آئے گی۔
ایک تازہ لیک میں بتایا گیا ہے کہ ایپل کا فولڈ ایبل آئی فون دوسرے تمام فولڈ ایبل فونز سے مختلف ہوگا کیونکہ اسے بالکل ہموار، کریز لیس ڈیزائن کے ساتھ تیار کیا جا رہا ہے۔ رپورٹ کے مطابق فون نے ٹیسٹنگ کا مرحلہ مکمل کر لیا ہے اور اب پری ماس پروڈکشن (ابتدائی پیداوار) میں داخل ہو چکا ہے۔
ابھی تک مارکیٹ میں موجودکوئی بھی فولڈ ایبل فون ایسا نہیں جو حقیقی معنوں میں کریز فری ہو، اسی لیے یہ ایپل کا فون کمپنی کے لیے ایک بڑا سنگ میل تصور کیا جا رہا ہے۔
اس جدید ڈیوائس کو ممکنہ طور پر ستمبر 2026 میں پیش کیا جائے گا۔
تاہم اسے خریدنا ہر صارف کے بس کی بات نہیں ہوگی، کیونکہ لیک کے مطابق اس کی ابتدائی قیمت 2400 ڈالرز (تقریباً پاکستانی 6 لاکھ 70 ہزار روپے) تک ہوسکتی ہے۔
اتنی زیادہ قیمت کا ایک اہم سبب اس کی جدید ’فلوئڈ میٹل ٹیکنالوجی‘ ہے جسے ڈسپلے کو کریز لیس بنانے کے لیے استعمال کیا جا رہا ہے، اور یہ ٹیکنالوجی خاصی مہنگی ہے۔
رپورٹ کے مطابق فولڈ ایبل آئی فون کی اندرونی اسکرین سام سنگ ڈسپلے تیار کرے گا، جبکہ پینل کا ڈھانچہ اور مجموعی ڈیزائن ایپل خود کرے گا۔
اس سے قبل بھی مختلف لیکس میں دعویٰ کیا گیا تھا کہ اگلے سال ایپل آئی فون 20 کی جگہ آئی فون ایئر اور آئی فون پرو ماڈلز پیش کرے گا، جن کے ساتھ فولڈ ایبل آئی فون فولڈ بھی شامل ہوسکتا ہے۔