متحدہ عرب امارات نے ایک بار پھر دنیا کو حیران کر دیا ہے۔ دبئی ملٹی کموڈٹیز سینٹر نے دنیا کی سب سے بڑی چاندی کی اینٹ پیش کر دی، جس کا وزن 1,971 کلوگرام ہے، جو متحدہ عرب امارات کے قیام کے سال 1971 کی علامتی نمائندگی کرتا ہے۔ یہ دیوقامت اینٹ اب باضابطہ طور پر گنیز ورلڈ ریکارڈ میں شامل ہو چکی ہے۔
عرب میڈیا کے مطابق اس شاندار تقریب کا انعقاد 24 نومبر کو دبئی پریشیس میٹلز کانفرنس کے دوران کیا گیا، جہاں دنیا بھر سے قیمتی دھاتوں کے ماہرین، صنعت کار اور سرمایہ کار موجود تھے۔ ماحول نہ صرف پُرجوش تھا بلکہ یہ لمحہ تاریخی نوعیت کا تھا۔
ڈی ایم سی سی کے ایگزیکٹو چیئرمین و سی ای او احمد بن سلیم نے اس پیشکش کو کانفرنس کے 13ویں ایڈیشن کا سب سے نمایاں سنگِ میل قرار دیا۔ انہوں نے کہا کہ یہ اینٹ 1.3 میٹر طویل ہے اور اپنی مثال آپ ایک شاہکار فن ہے جس میں کاریگری اور جدید ٹیکنالوجی کا حسین امتزاج نظر آتا ہے۔
حکام کے مطابق اس بھاری بھرکم اینگوٹ کا وزن صرف ایک عدد نہیں بلکہ ملک کی اختراع، تخلیقی صلاحیتوں اور عالمی سطح پر بڑھتے ہوئے اثر و رسوخ کی علامت بھی ہے۔