کراچی:(نیوزڈیسک)گورنرسندھ کامران خان ٹیسوری نے 15سے 21دسمبر تک جاری قومی پولیو مہم میں عوام سے بھرپور تعائون کی اپیل کرتے ہوئے کہا ہے کہ پولیو جیسے موذی مرض کا خاتمہ ہم سب کی مشترکہ قومی ذمہ داری ہے۔

گورنر ہائوس سے جاری اعلامیہ کے مطابق انہوں نے والدین اور سرپرستوں پر زور دیا کہ وہ قومی پولیو مہم کے دوران پانچ سال سے کم عمر ہر بچے کو پولیو کے قطرے ضرور پلوائیں تاکہ آنے والی نسل کو معذوری سے محفوظ بنایا جا سکے۔

گورنر سندھ نے کہا کہ پولیو کے خلاف کامیابی صرف اسی صورت ممکن ہے جب عوام، حکومت اور متعلقہ ادارے یکجہتی کے ساتھ اپنا کردار ادا کریں۔ انہوں نے کہا کہ پولیو ورکرز سخت حالات میں گھر گھر جا کر بچوں کو قطرے پلاتے ہیں، یہ قوم کے حقیقی محسن ہیں، عوام کا فرض ہے کہ ان سے مکمل تعائون کریں اور ان کی حوصلہ افزائی کریں۔

گورنر سندھ نے عوام سے اپیل کی کہ وہ کسی بھی قسم کی افواہوں پر کان نہ دھریں، پولیو کے قطرے محفوظ اور مو ثر ہیں اور بچوں کو عمر بھر کی معذوری سے بچانے کا واحد ذریعہ ہیں۔ انہوں نے کہا کہ آئیے عہد کریں کہ ہم سب مل کر پولیو فری پاکستان کے خواب کو حقیقت میں بدلیں گے اور اس قومی جدوجہد میں اپنا بھرپور کردار ادا کریں گے۔