لاہور:(نیوزڈیسک)پنجاب کی سبزی منڈیوں میں ایک بڑی تبدیلی کا آغاز ہو گیا ہے، جہاں وزیر اعلیٰ پنجاب مریم نواز کی ہدایت پر ماڈرن فروٹ اینڈ ویجی ٹیبل مارکیٹس متعارف کرا دی گئی ہیں۔ وزیر اعلیٰ کی صدارت میں ہونے والے اجلاس میں فیصلہ کیا گیا کہ ماڈرن سبزی منڈیوں میں شفاف نیلامی، ویسٹ ٹو ویلیو نظام، آف سیزن سبزیوں کے لیے جدید کاشتکاری، ہیلپ ڈیسک، سیف سٹی سے آن لائن ٹریکنگ، مناسب لائٹس، صفائی کے انتظامات اور فنکشنل ٹوئلٹس یقینی بنائے جائیں گے۔
اجلاس سے خطاب کرتے ہوئے وزیر اعلیٰ مریم نواز نے کہا کہ پنجاب سے مافیا کلچر کا خاتمہ کر دیا گیا ہے اور اب صوبے میں کوئی مافیا پنپ نہیں سکتا۔ انہوں نے عزم کا اظہار کیا کہ عوام کو ہر صورت سستی روٹی اور سستا آٹا فراہم کیا جائے گا۔ وزیر اعلیٰ نے وزیر زراعت عاشق کرمانی، معاون خصوصی سلمیٰ بٹ، ڈی جی فوڈ امجد حفیظ اور پوری ٹیم کو شاباش دیتے ہوئے کہا کہ پنجاب میں ایسے شاندار کام ہو رہے ہیں کہ دوسرے صوبے تقلید کرنے پر مجبور ہو گئے ہیں۔
وزیر اعلیٰ مریم نواز شریف نے آف سیزن سبزیوں کے حصول کے لیے جدید طریقۂ کاشت اختیار کرنے کی ہدایت دیتے ہوئے عوام کو دھوکہ دینے والے پرائس کنٹرول مجسٹریٹس کے خلاف فوری کارروائی کا حکم دیا اور ایسے افسران کو نوکری سے فارغ کر کے جیل بھیجنے کی ہدایت کی۔ اجلاس میں بتایا گیا کہ پنجاب کی 188 ماڈرن سبزی منڈیوں میں خریداروں اور آڑھتیوں کے لیے صاف پانی کی فراہمی کے تمام واٹر فلٹریشن پلانٹس بحال کر دیے گئے ہیں۔
اجلاس میں یہ بھی بتایا گیا کہ پاکپتن، قصور، ساہیوال، میاں چنوں، شیخوپورہ اور منڈی بہاؤالدین میں بھی ماڈرن سبزی منڈیاں قائم کی جائیں گی، جبکہ مری کے عوام کو سستے پھل اور سبزیاں فراہم کرنے کے لیے سپلائی چین سسٹم قائم کر دیا گیا ہے، جس کے بعد مری میں ہول سیل نرخ پر پھل اور سبزیاں دستیاب ہوں گی۔
