اسلام آباد:(نیوزڈیسک) وزیراعظم محمد شہباز شریف نے حلال گوشت کی برآمدکیلئےپالیسی کی منظوری دے دی۔ اسلام آباد میں جائزہ اجلاس کی صدارت کرتے ہوئے وزیراعظم نے ہدایت کی کہ حلال گوشت کی برآمد بڑھانے کے لیے عملی اقدامات پر مشتمل تین سالہ جامع حکمت عملی دو ہفتے میں پیش کی جائے۔
انہوں نے ہدایت کی کہ بزنس ماڈل کو عالمی سطح پر تسلیم شدہ بہترین لائحہ عمل سے استفادہ کرتےہوئے مرتب کیا جائے۔ انہوں نے کہا کہ حلال گوشت کی عالمی مارکیٹ میں پاکستان کا برآمدی حصہ بڑھانے کی خاطر خواہ گنجائش موجود ہے۔ اس مقصدکے لیے متعلقہ وزارتوں اور صوبائی حکومتوں کی ہم آہنگی سے جامع حکمت عملی ناگزیر ہے۔
انہوں نےکہا کہ حلال گوشت کی پیداواری اور غذائی قدر میں اضافے کے لیے صوبائی حکومتوں کے تعاون سے منظم مراکز وقت کی اہم ضرورت ہے۔اس سلسلے میں قائم کمیٹی پیداوار، کولڈ سٹوریج اور دیگر عوامل بہتر بنانے کے لیے قابل عمل تجاویز پیش کرے۔ معیار کو یقینی بناتے ہوئےحلال گوشت کی پیداوار کو علاقائی پیداواری مقدار کی مسابقت میں بڑھانے کے لیے خصوصی اقدامات کیے جائیں۔
محمد شہبازشریف نے کہا کہ ملک میں موجود ذبیح خانوں کی عالمی معیار کی سرٹیفیکشن اور دوسرے ملکوں سے دو طرفہ رجسٹریشن میں حکومت ہر ممکن مدد فراہم کرے گی۔ انہوں نے کہا کہ ملک میں موجود ذبیح خانوں کو بیماری سے پاک اور ان میں عالمی معیار کی صفائی ستھرائی کے انتظامات کو یقینی بنانے کے لیے خصوصی اقدامات کیے جائیں اور حلال گوشت کی برآمد بڑھانے کے لیے لاگت کو کم کرنے پر خصوصی توجہ دی جائے ۔
