لاہور(نیوز ڈیسک) ملک کے مختلف شہروں میں دھند کے ڈیرے رہے، حدنگاہ متاثر ہونے سے موٹرویز متعدد مقامات سے بند کردی گئی۔

موٹروے ایم ون پشاور سے رشکئی اور صوابی سے برہان تک بند کر دی گئی، ایم 2 لاہورسے کوٹ مومن، ایم 3 فیض پورسے جڑانوالہ تک بند کر دی گئی، موٹروے ایم 5 پرملتان سے روہڑی تک گاڑیوں کا مکمل داخلہ بند کر دیا گیا۔

لاہور سیالکوٹ موٹروے ایم 11 بھی دھند کی وجہ سے بند کردی گئی، گوجرانوالہ، بہاولپور، احمد پور شرقیہ، رحیم یار خان اور صادق آباد میں بھی شدید دھند رہی، قومی شاہراہوں پر بھی حد نگاہ کم ہوگئی، ٹریفک کی روانی متاثر ہوئی، ترجمان موٹر وے پولیس نے شہریوں کو غیر ضروری سفر سے گریز کی ہدایت کردی۔

ملک کے مختلف شہروں میں فضائی آلودگی بھی برقرار رہی، ،لاہور دنیا کے آلودہ شہروں میں پہلے نمبر پر آگیا، ایئر کوالٹی انڈیکس428 تک پہنچ گیا، رحیم یار خان میں اے کیو آئی459، گوجرانوالہ میں447 اور فیصل آباد میں434 ریکارڈ کیا گیا۔