کرشنگ کے مہینے میں بھی بیرون ملک سے چینی کی درآمد جاری ہے ، وفاقی حکومت نے نومبر میں مزید 76 ہزار 752 میٹرک ٹن چینی درآمد کرلی ہے۔

ادارۂ شماریات کے اعداد و شمار کے مطابق رواں مالی سال کے پہلے5 ماہ میں مجموعی طور پر 3 لاکھ 8 ہزار 142 ٹن چینی درآمد کی گئی۔

اعداد و شمار کے مطابق نومبر میں 12 ارب 6 کروڑ 60 لاکھ روپے کی 76 ہزار 752 ٹن چینی درآمد کی گئی ۔

جولائی سے نومبر کی مدت کے دوران 3 لاکھ 8 ہزار 142 ٹن چینی درآمد کی گئی، جس کی مالیت 49 ارب 4 کروڑ 20 لاکھ روپے ہے ۔

خیال رہے کہ وفاقی کابینہ نے 4 جولائی کو 5 لاکھ ٹن چینی درآمد کرنے کی منظوری دی تھی ۔

پاکستان شوگر ملز ایسوسی ایشن نے چینی درآمد کرنے کے حکومتی فیصلے کی مخالفت کی تھی، چینی سرکاری سطح پر ٹی سی پی کے ذریعے درآمد کرنے کا فیصلہ ہوا تھا۔

وفاقی حکومت کی جانب سے چینی کی درآمد پر ٹیکسوں سے استثنیٰ بھی دیا گیا تھا۔