اسلام آباد: (نیوزڈیسک)وفاقی آئینی عدالت نے سپریم کورٹ میں موجود 79 کروڑ روپے کی دوبارہ سرمایہ کاری کا حکم دے دیا ہے۔عدالت نے ہدایت کی ہے کہ یہ رقم نیشنل بینک کے ذریعے ٹریژری بلز میں سرمایہ کاری کی جائے۔

عدالتی حکم میں کہا گیا ہے کہ سپریم کورٹ سے 79 کروڑ 42 لاکھ روپے آئینی عدالت کو فراہم کیے جائیں، جبکہ رجسٹرار کو فوری طور پر ضروری اقدامات کرنے کی بھی ہدایت جاری کی گئی ہے۔نیشنل بینک نے عدالت کو آگاہ کیا کہ عدالتی حکم کے بغیر رقم کی دوبارہ سرمایہ کاری ممکن نہیں تھی۔

بینک حکام کے مطابق رقم کی آخری سرمایہ کاری 4 ستمبر 2025 کو ٹریژری بلز میں کی گئی تھی، جبکہ سابقہ سرمایہ کاری 27 نومبر 2025 کو میچیور ہو چکی تھی۔یہ سماعت ایس بی کمپلیکس اونرز ویلفیئر ایسوسی ایشن کی درخواست پر کی گئی، جس کی سماعت چیف جسٹس آئینی عدالت امین الدین خان کی سربراہی میں تین رکنی بینچ نے کی۔ عدالت نے کیس کی مزید سماعت فروری کے پہلے ہفتے تک ملتوی کر دی ہے۔