کراچی ائیرپورٹ پر وفاقی تحقیقاتی ادارے (ایف آئی اے) امیگریشن ٹیم نے کارروائی کرتے ہوئے ایک مسافر کو جعلی شیئر کوڈ ای ویزا پر بیرون ملک جانے کی کوشش ناکام بنا دیا۔
ایف آئی اے کے ترجمان کے مطابق، محمد عمران نامی مسافر کراچی سے برطانیہ کے لیے پرواز پی سی 131 سے ترکیہ جا رہا تھا، اور اس نے ترکیہ ای ویزا حاصل کرنے کے لیے برطانیہ کا ای ویزا شیئر کوڈ استعمال کیا۔ تاہم امیگریشن کلیئرنس کے دوران معلوم ہوا کہ پیش کیا گیا ای ویزا جعلی تھا۔ تحقیقات سے یہ بھی سامنے آیا کہ ملزم نے یوکے شیئر کوڈ جعلی نکاح نامے کی بنیاد پر حاصل کیا تھا۔
ترجمان نے بتایا کہ ملزم کے قبضے سے برآمد شواہد میں نکاح کی جعلی ایڈیٹ شدہ تصاویر بھی شامل تھیں اور تمام دستاویزات و ٹکٹس لاہور کے مختلف ایجنٹوں کے ذریعے تیار کروائی گئی تھیں۔ ملزم نے 70 لاکھ روپے کے عوض یہ دستاویزات بنوائی تھیں، جن میں سے 35 لاکھ روپے پہلے ہی ادا کیے جا چکے تھے۔
ایف آئی اے کے مطابق دوران تفتیش ملزم نے انکشاف کیا کہ اس کی شادی 2014 میں ہوئی اور اس کے چار بچے ہیں۔
ملزم کو مزید قانونی کارروائی کے لیے ایف آئی اے اینٹی ہیومن ٹریفکنگ سرکل کراچی کے حوالے کر دیا گیا ہے۔