کراچی(نیوز ڈیسک) پاک فوج کی جانب سے گوادر یونیورسٹی کے طلبہ و طالبات کے لیے کراچی کا مطالعاتی دورہ کامیابی کے ساتھ مکمل ہو گیا۔ اس دورے کا مقصد طلبہ کو تعلیمی، تحقیقی اور عملی مشاہدات فراہم کرنا تھا تاکہ وہ مختلف قومی اداروں کے کردار اور اہمیت کو قریب سے سمجھ سکیں۔
دورے کے دوران طلبہ نے مزارِ قائد اور پی اے ایف میوزیم کا دورہ کیا، جہاں انہیں قائدِاعظم محمد علی جناح کی جدوجہد اور پاک فضائیہ کی تاریخ سے آگاہی حاصل ہوئی، جبکہ دفاعی شعور کو بھی تقویت ملی۔ اس کے علاوہ طلبہ نے پاکستان میری ٹائم میوزیم کا بھی دورہ کیا، جہاں بحری امور کی اہمیت اور پاک بحریہ کے کردار پر جامع بریفنگ دی گئی۔
علمی آگاہی کے فروغ کے لیے جامعہ کراچی کا دورہ بھی کرایا گیا، جس کے ذریعے طلبہ کو اعلیٰ تعلیمی ماحول، تحقیقی رجحانات اور تعلیمی سہولیات سے روشناس کرایا گیا۔ اس موقع پر طلبہ نے جامعہ کراچی کے تعلیمی معیار اور تحقیقی سرگرمیوں کو سراہا۔
سماجی اور تفریحی سرگرمیوں کے تحت طلبہ کو بحریہ ٹاؤن، ایفل ٹاور اور کارنیول پارک کے دورے بھی کرائے گئے، جس سے انہیں ذہنی تازگی کے ساتھ ساتھ ایک مثبت اور یادگار تجربہ حاصل ہوا۔
مطالعاتی دورے کے اختتام پر گوادر یونیورسٹی کے طلبہ و طالبات نے پاک فوج کا شکریہ ادا کرتے ہوئے خراجِ تحسین پیش کیا اور کہا کہ ایسے دورے نہ صرف علم میں اضافہ کرتے ہیں بلکہ قومی اداروں کے ساتھ وابستگی اور فخر کے جذبات کو بھی مضبوط بناتے ہیں۔ طلبہ کا کہنا تھا کہ ہمیں اپنی پاک فوج پر فخر ہے۔
