بھارت(ویب ڈیسک) ریاست اترپردیش میں پولیس نے ایک گھر میں باجماعت نماز ادا کرنے پر 12 افراد کو گرفتار کر لیا۔

کشمیر میڈیا سروس کے مطابق سوشل میڈیا پر ایک ویڈیو وائرل ہوئی تھی جس میں ضلع بریلی گاؤں کے مسلمان ایک گھر کے اندر باجماعت نماز ادا کر رہے تھے۔

بھارتی میڈیا کے مطابق مقامی افراد نے پولیس کو اطلاع دی کہ ایک خالی مکان کو عارضی مسجد کے طور پر استعمال کیا جا رہا ہے جس پر پولیس نے امن و امان خراب کرنے کے الزام میں 12 افراد کو گرفتار کر لیا۔

رپورٹ کے مطابق مالک مکان کی اجازت اور مرضی سے گاؤں کے مسلمان وہاں نماز ادا کر رہے تھے۔ گرفتار افراد کو مجسٹریٹ کے سامنے پیش کیا گیا، عدالت نے انہیں ضمانت پر رہا کر دیا۔