کابل:(ویب ڈیسک) افغانستان اور تاجکستان کے درمیان سرحدی کشیدگی کے بعد چین نے اپنے شہریوں کو سرحدی علاقوں سے فوری طور پر نکلنے کی ہدایت جاری کر دی ہے۔

تاجک بارڈر فورسز کے مطابق اتوار کے روز دراندازی کی کوشش کے دوران چار افغان دہشت گرد مارے گئے تھے، جس کے بعد خطے میں سیکیورٹی صورتحال مزید کشیدہ ہو گئی ہے۔

تاجکستان میں قائم چینی سفارتخانے نے اپنے شہریوں کو غیر ضروری طور پر متاثرہ علاقوں کا سفر نہ کرنے کی ہدایت کی ہے۔

سفارتخانے کے بیان میں کہا گیا ہے کہ چینی شہری خطے کی مجموعی صورتحال پر گہری نظر رکھیں اور تمام احتیاطی تدابیر یقینی بنائیں، جبکہ افغانستان اور تاجکستان کے سرحدی علاقے سے بروقت اور محفوظ انداز میں نکل جائیں۔

ادھر گزشتہ روز کابل میں ہونے والے دھماکے کے نتیجے میں ایک چینی شہری سمیت سات افراد ہلاک جبکہ تیرہ زخمی ہو گئے تھے۔ سیکیورٹی ذرائع کے مطابق افغانستان سے دہشت گردوں کی دراندازی پاکستان سمیت خطے کے دیگر ممالک کے لیے بھی ایک بڑا چیلنج بن چکی ہے۔

تجزیہ کاروں کا کہنا ہے کہ افغانستان میں سرگرم شرپسند عناصر اور طالبان کی جانب سے دہشت گرد گروہوں کی مبینہ پشت پناہی خطے میں عدم استحکام کا سبب بن رہی ہے، جس کے باعث پڑوسی ممالک کی سیکیورٹی تشویش میں اضافہ ہو رہا ہے۔