اینٹی نارکوٹکس فورس (اے این ایف) نے جناح انٹرنیشنل ایئرپورٹ کراچی پر کارروائی کرتے ہوئے سعودی عرب جانے والے ایک مسافر کے سامان سے 875 گرام آئس اور 90 گرام ہیروئن برآمد کر لی ہے۔
اے این ایف کے ترجمان کے مطابق عمرے کی غرض سے سعودی عرب روانہ ہونے والے مسافر کو مشکوک قرار دے کر اس کے سامان کی تلاشی لی گئی، جس کے دوران منشیات برآمد ہوئیں۔ کارروائی کے نتیجے میں ایک ملزم کو گرفتار کر لیا گیا ہے۔
ترجمان نے بتایا کہ بلوچستان میں کچلاک بائی پاس، ضلع کوئٹہ کے قریب ایک گاڑی سے 78 کلوگرام چرس برآمد کی گئی، جبکہ اسی علاقے میں ایک اور کارروائی کے دوران 61 کلوگرام آئس ضبط کی گئی، جن میں دو ملزمان گرفتار ہوئے۔
مزید کارروائیوں میں چونگی نمبر 26، اسلام آباد کے قریب ایک گاڑی سے 18 کلوگرام چرس جبکہ جی ٹی روڈ راولپنڈی پر اسپتال کے قریب ایک ملزم سے 2.2 کلوگرام چرس برآمد کی گئی، جس میں مزید دو افراد کو حراست میں لیا گیا۔
اے این ایف کے مطابق مجموعی طور پر ان کارروائیوں کے دوران 195.22 کلوگرام منشیات ضبط کی گئیں، جن کی مالیت تقریباً 2 کروڑ 35 لاکھ روپے بتائی جا رہی ہے۔ تمام مقدمات انسداد منشیات ایکٹ 1997 کے تحت درج کر کے تحقیقات کا آغاز کر دیا گیا ہے۔