عالمی اور مقامی مارکیٹوں میں سونے اور چاندی کی قیمتیں مسلسل بڑھتے ہوئے نئی تاریخ رقم کر رہی ہیں، جس کے باعث خریدار اور سرمایہ کار دونوں ہی حیران دکھائی دے رہے ہیں۔
بین الاقوامی بلین مارکیٹ میں سونے کی فی اونس قیمت میں مزید 65 ڈالر کا نمایاں اضافہ ہوا، جس کے بعد سونا 4 ہزار 988 ڈالر کی بلند ترین سطح پر پہنچ گیا۔
عالمی مارکیٹ میں اضافے کے اثرات مقامی صرافہ بازاروں میں بھی واضح طور پر دیکھے گئے۔ 24 قیراط سونے کی فی تولہ قیمت میں 6 ہزار 500 روپے کا بڑا اضافہ ریکارڈ کیا گیا، جس کے بعد سونا 5 لاکھ 21 ہزار 162 روپے کی نئی بلند ترین سطح پر پہنچ گیا۔ اسی طرح 10 گرام سونے کی قیمت بھی 5 ہزار 573 روپے اضافے کے بعد 4 لاکھ 46 ہزار 812 روپے ہو گئی۔
چاندی کی قیمتوں میں بھی نمایاں تیزی دیکھنے میں آئی۔ فی تولہ چاندی کی قیمت ایک ہی دن میں 526 روپے بڑھ کر 10 ہزار 801 روپے کی نئی بلند سطح پر جا پہنچی، جبکہ 10 گرام چاندی کی قیمت 451 روپے اضافے کے ساتھ 9 ہزار 260 روپے تک پہنچ گئی۔
مسلسل اضافے کے باعث بازار میں بے یقینی کی فضا ہے، جبکہ ماہرین کے مطابق عالمی معاشی حالات اور سرمایہ کاری کے رجحانات قیمتی دھاتوں کی قیمتوں پر اثر انداز ہو رہے ہیں۔