راجن پور کے کچے کے علاقے میں جاری بڑے آپریشن کے دوران پولیس کو ایک اور اہم کامیابی حاصل ہوئی ہے، جہاں ایک کروڑ روپے سر کی قیمت والے بدنام ڈاکو صدری سمیت مزید 24 انتہائی مطلوب ڈاکوؤں نے ہتھیار ڈال دیے ہیں۔
ڈی پی او راجن پور محمد عمران کے مطابق لونڈ گینگ کے سرغنہ نے اپنے ساتھیوں کے ہمراہ پولیس کے سامنے سرینڈر کیا۔ ان کا کہنا تھا کہ حالیہ سرینڈر کے بعد کچہ آپریشن میں خود کو قانون کے حوالے کرنے والے ڈاکوؤں کی مجموعی تعداد 211 تک پہنچ چکی ہے۔
محمد عمران نے بتایا کہ سرینڈر کرنے والے یہ ملزمان پولیس اہلکاروں کی شہادت، قتل، اغواء برائے تاوان اور ڈکیتی جیسے سنگین مقدمات میں طویل عرصے سے مطلوب تھے۔ انہوں نے کہا کہ کچے کے علاقے کا تقریباً 80 فیصد حصہ کلیئر کر لیا گیا ہے اور گرفتار ڈاکوؤں کے خلاف قانون کے مطابق کارروائی کی جائے گی۔
ڈی پی او کے مطابق آپریشن کے دوران جدید ڈرون ٹیکنالوجی کا بھرپور استعمال کیا جا رہا ہے، جس کے ذریعے ڈاکوؤں کے ٹھکانوں کی مسلسل نگرانی اور نشاندہی کی گئی۔ اب تک 29 ٹھکانے تباہ کیے جا چکے ہیں جبکہ متعدد ڈاکو زخمی بھی ہوئے ہیں۔
پولیس حکام کا کہنا ہے کہ کچہ آپریشن کا مقصد علاقے میں امن قائم کرنا اور عوام کو جرائم کے خوف سے نجات دلانا ہے، اور یہ کارروائیاں اس وقت تک جاری رہیں گی جب تک مکمل امن بحال نہیں ہو جاتا۔