اکرا(ویب ڈیسک) :پاکستان اور گھانا کے مابین سیاسی مشاورت کا پہلا دور گھانا میں منعقد ہوا ۔ترجمان دفتر خارجہ کے مطابق مشاورتی اجلاس میں سیاسی، معاشی، دفاعی، سیاحتی، ثقافتی، صحت، تعلیم اور انفارمیشن ٹیکنالوجی سمیت مختلف شعبوں میں تعاون کے فروغ پر اتفاق کیا گیا۔
اس کے علاوہ دوطرفہ سیاسی مشاورت اور فارن سروس اکیڈمی اسلام آباد اور گھانا فارن سروس انسٹیٹیوٹ کے درمیان تعاون پر مفاہمتی یاداشتوں پر دستخط کیے گئے۔فریقین نے اس عزم کا بھی اعادہ کیا کہ ادارہ جاتی مکالمے کے اس عمل کے ذریعے دوطرفہ تعلقات کو مزید بامعنی اور منصوبہ جاتی بنیادوں پر آگے بڑھایا جائے گا۔اجلاس میں یہ فیصلہ کیا گیا کہ دوطرفہ سیاسی مشاورتی اجلاس کا اگلا دور آئندہ سال اسلام آباد میں منعقد ہوگا۔
