امریکا نے سعودی عرب کو تقریباً 9 ارب ڈالر مالیت کے پیٹریاٹ میزائل سسٹمز فروخت کرنے کی باضابطہ منظوری دے دی ہے، جسے خطے میں دفاعی تعاون کے ایک اہم قدم کے طور پر دیکھا جا رہا ہے۔
پینٹاگون کی جانب سے جاری بیان کے مطابق اس معاہدے کے تحت سعودی عرب کو جدید پیٹریاٹ کیپیبلٹی میزائلز کے ساتھ متعلقہ دفاعی آلات، تکنیکی سپورٹ اور لاجسٹک سہولیات فراہم کی جائیں گی۔ امریکی حکام کا کہنا ہے کہ اس فروخت کا بنیادی مقصد سعودی عرب کی دفاعی صلاحیتوں کو مضبوط بنانا اور مشرقِ وسطیٰ میں سلامتی کے توازن کو برقرار رکھنا ہے۔
یہ منظوری ایسے وقت میں سامنے آئی ہے جب امریکا خطے میں اپنے اتحادی ممالک کے ساتھ دفاعی تعاون کو مزید وسعت دے رہا ہے۔ اس سے قبل امریکا نے اسرائیل کو بھی 6.5 ارب ڈالر مالیت کے فوجی سازوسامان کی فروخت کی منظوری دی تھی، جو واشنگٹن کی خطے میں اسٹریٹجک ترجیحات کی عکاسی کرتی ہے۔
امریکی محکمہ خارجہ کے مطابق اسرائیل کو فراہم کیے جانے والے فوجی پیکج میں 3.8 ارب ڈالر مالیت کے اپاچی ہیلی کاپٹر، 1.98 ارب ڈالر کی لائٹ وہیکلز، نیمر آرمڈ پرسنل کیریئر کے پاور پیکس، لاجسٹک سپورٹ اور دیگر جدید دفاعی آلات شامل ہیں۔
دفاعی ماہرین کا کہنا ہے کہ امریکا کی جانب سے سعودی عرب اور اسرائیل کو بڑے پیمانے پر فوجی سازوسامان کی فروخت خطے میں بدلتی ہوئی سکیورٹی صورتحال اور امریکی اسٹریٹجک مفادات کی واضح عکاس ہے۔ ماہرین کے مطابق یہ معاہدے نہ صرف اتحادی ممالک کے دفاع کو مضبوط بنائیں گے بلکہ مشرقِ وسطیٰ میں امریکا کے اثر و رسوخ کو بھی برقرار رکھنے میں مددگار ثابت ہوں گے۔