پاکستان کی معروف ٹک ٹاکر اور سوشل میڈیا انفلوئنسر جنت مرزا کی بہن، علشبہ انجم، نے اپنی آنے والی شادی کے حوالے سے سادگی اختیار کرنے کا اعلان کر دیا ہے۔
انٹرنیٹ سیلیبریٹیز کی عموماً پرتعیش اور شاندار شادیوں کے رجحان کے برعکس، علشبہ کا کہنا ہے کہ وہ شادی تقریب محدود بجٹ میں، صرف نکاح اور ولیمے تک رکھیں گی۔ انہوں نے بتایا کہ شادی کے لیے ان کا تخمینہ شدہ بجٹ تقریباً 20 سے 30 لاکھ روپے ہے اور وہ غیر ضروری دکھاوے کی بجائے سادگی کو ترجیح دیں گی۔
اس موقع پر علشبہ نے اپنے ملبوسات کی قیمتوں کی تفصیل بھی شیئر کی۔ ان کی جینز جاپان سے خریدی گئی جس کی قیمت 20 ہزار روپے ہے، شرٹ 10 ہزار روپے میں لی گئی اور جوتوں کی قیمت تقریباً 25 ہزار روپے تک ہے۔
علشبہ کی یہ ویڈیو سوشل میڈیا پر وائرل ہو گئی اور صارفین نے مختلف ردعمل دیا۔ متعدد افراد نے ان کے سادگی کے فیصلے کو سراہا، تاہم کچھ نے حیرت کا اظہار کرتے ہوئے سوال کیا کہ کیا واقعی 20 سے 30 لاکھ روپے کے بجٹ کو سادہ شادی کہا جا سکتا ہے۔
علشبہ انجم سوشل میڈیا پر بے حد مقبول ہیں۔ ان کے انسٹاگرام پر 30 لاکھ سے زیادہ اور ٹک ٹاک پر ایک کروڑ 90 لاکھ سے زائد فالوورز موجود ہیں۔