کینیبرا:(ویب ڈیسک) آسٹریلیا نے اعلان کیا ہے کہ جون 2026 کے بعد افغان سفارتخانہ اپنی تمام سرگرمیاں بند کر دے گا۔ یہ فیصلہ طالبان رجیم کی غیرجمہوری اور شدت پسند پالیسیوں کے باعث کیا گیا ہے، جس سے افغانستان کو عالمی سطح پر مزید تنہائی کا سامنا ہے۔

آسٹریلیا کے محکمہ خارجہ و تجارتی امور کے مطابق، طالبان کے تعینات کردہ سفارت کار یا اعزازی قونصلر سمیت کسی بھی نمائندے کو قبول نہیں کیا جائے گا۔ آسٹریلوی حکومت نے صاف کہا کہ وہ طالبان کو افغان عوام کے جائز نمائندے کے طور پر تسلیم نہیں کرے گی۔

طالبان کے اقتدار میں دوبارہ آنے کے بعد دنیا بھر میں افغان سفارتخانوں کی بندش میں مسلسل اضافہ ہوا ہے، اور کئی ممالک نے افغان مہاجرین کا داخلہ بند یا ملک بدر کر دیا ہے۔

ماہرین کے مطابق، افغان سفارتخانے کی بندش محض ایک انتظامی قدم نہیں بلکہ طالبان کے خلاف بڑھتے عالمی عدم اعتماد کی واضح علامت ہے۔ طالبان کی شدت پسند اور آمرانہ پالیسیاں افغانستان کو عالمی تنہائی اور اقتصادی بحران کی دلدل میں دھکیل رہی ہیں، جس کے باعث سفارتی تعلقات مسلسل ختم ہو رہے ہیں۔