کوئٹہ(نیوز ڈیسک) بلوچستان میں بھارتی پراکسی فتنہ الہندوستان کی حالیہ دہشتگردانہ کارروائیوں کے دوران پاک فوج نے عوام کی حفاظت اور متاثرہ خاندانوں کی مدد کے لیے بروقت اور مؤثر اقدامات کیے، جس پر متاثرہ شہریوں کی جانب سے پاک فوج کی جرات، قربانی اور پیشہ ورانہ صلاحیتوں کو سراہا جا رہا ہے۔

ذرائع کے مطابق دہشتگردی کے ان واقعات میں پاک فوج نے فوری رسپانس دیتے ہوئے زخمیوں کو محفوظ مقامات سے نکالا، ایمبولینس کے ذریعے قریبی اسپتالوں تک منتقل کیا اور انہیں طبی سہولیات فراہم کیں۔

نوشکی، بلوچستان سے تعلق رکھنے والی ایک متاثرہ لڑکی نے پاک فوج کے کردار کو سراہتے ہوئے بتایا کہ رات تقریباً چار بجے بلوچی لباس پہنے دو دہشتگردوں نے ان کے گھر پر حملہ کیا اور پورے خاندان کو نشانہ بنایا۔ متاثرہ لڑکی کے مطابق پاک فوج نے بروقت موقع پر پہنچ کر ان کی جان بچائی اور انہیں فوری طور پر ایمبولینس کے ذریعے اسپتال منتقل کیا گیا جہاں انہیں بہترین طبی نگہداشت فراہم کی جا رہی ہے۔

اسی طرح گوادر، بلوچستان سے تعلق رکھنے والی ایک زخمی خاتون نے اپنے بیان میں کہا کہ پاک فوج کے جوانوں نے انہیں محفوظ طریقے سے ایمبولینس میں اسپتال پہنچایا اور دورانِ علاج ان کا بھرپور خیال رکھا۔ ان کا کہنا تھا کہ اگر پاک فوج بروقت نہ پہنچتی تو جانی نقصان کا خدشہ بہت زیادہ تھا۔

متاثرہ خاندانوں نے پاک فوج کے فوری اور مؤثر ردعمل کو سراہتے ہوئے کہا کہ سیکیورٹی فورسز نے مشکل وقت میں ان کے ساتھ کھڑے ہو کر یہ ثابت کیا کہ وہ عوام کی جان و مال کے تحفظ کے لیے ہر دم تیار ہیں۔ شہریوں کا کہنا ہے کہ دہشتگردوں کی بزدلانہ کارروائیاں ان کے حوصلے پست نہیں کر سکتیں اور وہ اپنی افواج کے ساتھ کھڑے ہیں۔

علاقے کے مکینوں نے اس عزم کا اظہار کیا کہ دہشتگردی کے خلاف جنگ میں وہ ریاست اور سیکیورٹی فورسز کے ساتھ مکمل تعاون جاری رکھیں گے اور بلوچستان کے امن کو سبوتاژ کرنے کی ہر کوشش ناکام بنائی جائے گی۔