اسلام آباد (نیوز ڈیسک)وفاقی وزیر اطلاعات و نشریات عطاء اللہ تارڑ نے کہا ہے کہ پہلی بار دیکھا گیا ہے کہ پہیہ جام کی کال خود جام ہو گئی۔ عوام نے نفرت، انتشار اور تقسیم کی سیاست کو واضح طور پر مسترد کر دیا ہے۔

سماجی رابطے کی ویب سائٹ ایکس پر اپنے پیغام میں انہوں نے کہا کہ عوام احتجاجی سیاست سے تنگ آ چکے ہیں اور تحریک انصاف کی کال کو بری طرح ناکامی کا سامنا کرنا پڑا ہے۔ ان کا کہنا تھا کہ اتوار کے روز بھی شہروں میں معمول کی گہما گہمی دیکھی گئی، بازار کھلے رہے اور ٹریفک رواں دواں رہی۔

عطاء اللہ تارڑ نے مزید کہا کہ یہ اس بات کا ثبوت ہے کہ عوام ملک میں استحکام، ترقی اور امن چاہتے ہیں نہ کہ آئے روز کی احتجاجی سیاست۔ انہوں نے کہا کہ عوام نے اپنے طرزعمل سے ثابت کر دیا ہے کہ وہ منفی سیاست کے بجائے مثبت راستے کا انتخاب کر چکے ہیں۔

وفاقی وزیر اطلاعات نے زور دیا کہ حکومت عوامی خدمت اور معیشت کی بحالی پر توجہ مرکوز رکھے گی جبکہ انتشار پھیلانے کی ہر کوشش کو ناکام بنایا جائے گا۔