کابل/اسلام آباد (نیوز ڈیسک)افغان طالبان رجیم نے نیا جابرانہ فوجداری ضابطہ متعارف کرا دیا ہے جسے قانون کی آڑ میں آمریت اور خوف کے نظام کے نفاذ کی کوشش قرار دیا جا رہا ہے۔ طالبان اپنے غیر قانونی اقتدار کو مضبوط کرنے کے لیے نئے ضابطے کے ذریعے عوام پر جبر اور دباؤ بڑھانے کی حکمت عملی پر گامزن ہو گئے ہیں۔
بین الاقوامی جریدے یوریشیا کے مطابق طالبان رجیم کا نیا فوجداری ضابطہ دراصل نظریاتی اطاعت مسلط کرنے اور جبر پر مبنی ریاستی حکمت عملی کا ڈھانچہ ہے۔ رپورٹ میں کہا گیا ہے کہ اس ضابطے کے تحت طبقاتی انصاف کو قانونی حیثیت دے دی گئی ہے جبکہ مذہبی اور سیاسی تنوع کو جرم بنا دیا گیا ہے۔
یوریشیا کے مطابق نئے طالبان ضابطے میں خواتین کی خودمختاری کو محدود کر دیا گیا ہے اور گھریلو تشدد کو عملی طور پر جائز قرار دینے کی راہ ہموار کی گئی ہے، جو انسانی حقوق کے عالمی اصولوں کی صریح خلاف ورزی ہے۔
عالمی ماہرین کا کہنا ہے کہ طالبان کا نیا فوجداری ضابطہ خوف اور جبر کے ذریعے اقتدار کو مضبوط کرنے کی کوشش ہے جو عام شہریوں کے تحفظ کے لیے شدید خطرات پیدا کرتا ہے۔ ماہرین کے مطابق یہ ضابطہ انسانی حقوق، خواتین کی آزادی اور مذہبی اقدار کے بنیادی اصولوں کے خلاف ہے اور سماجی و طبقاتی ناانصافی کو فروغ دیتا ہے۔
رپورٹ میں مزید کہا گیا ہے کہ دہشت گرد گروہوں کی سرپرستی سے لے کر نام نہاد فوجداری ضابطے کے نفاذ تک طالبان رجیم کا جابرانہ چہرہ ایک بار پھر بے نقاب ہو چکا ہے، جبکہ عالمی برادری کی جانب سے اس اقدام پر شدید تحفظات کا اظہار کیا جا رہا ہے۔
