اسلام آباد(صغیر چوہدری )یورپی یونین یوکرین کی حمایت میں سامنے آگیا۔یورپی یونین نے یوکرین کے لیے مزید 90 ارب یورو امداد اور روس کے خلاف پابندیاں جاری رکھنے کا اعلان کردیا جبکہ روسی جارحیت کی مذمت کرتے ہوئے فوری جنگ بندی کا مطالبہ بھی کیا گیا۔
اسلام آباد میں یوکرین سے اظہارِ یکجہتی کے لئے یورپی یونین کی جانب سے منعقدہ تقریب میں یوکرین پر روسی جارحیت کے چار سال مکمل ہونے پر شدید الفاظ میں مذمت کی گئی
اسلام آباد میں یورپی یونین کے وفد، ٹیم یورپ اور یوکرین کے سفارت خانے کے اشتراک سے تقریب پولینڈ کے سفارت خانے میں منعقد ہوئی جس میں سفارتکاروں، سیاستدانوں، صحافیوں، انسانی حقوق کے کارکنوں اور سول سوسائٹی کے نمائندوں نے شرکت کی اور یوکرین کے ساتھ یکجہتی کا اظہار کیا۔
اس موقع پر روسی جارحیت، خصوصاً توانائی کے بنیادی ڈھانچے پر حملوں کی شدید مذمت کی گئی اور فوری جنگ بندی کا مطالبہ کیا گیا۔ یورپی یونین نے یوکرین کے لیے مزید 90 ارب یورو امداد اور روس کے خلاف پابندیاں جاری رکھنے کا اعلان بھی کیا۔
یوکرینی سفیر مارکیان چچک اور یورپی سفیر رائمونڈاس کاروبلس سمیت دیگر سفیروں نے یوکرین کی خودمختاری کی حمایت کا اعادہ کرتے ہوئے روس پر بامعنی امن مذاکرات کے لیے دباؤ بڑھانے پر زور دیا۔ تقریب میں روسی حملوں کو عالمی امن اور سلامتی کے لیے خطرہ قرار دیا گیا اور جنگی جرائم پر جوابدہی کی ضرورت پر بھی زور دیا گیا۔تقریب میں سفیروں اور شرکا کو روسی جارحیت کے حوالے سے ایک ڈاکومنٹری بھی دکھائی گئی جبکہ یوکرین میں جنگ کی تباہ کاروں کے حوالے سے تصویری نمائش کا اہتمام بھی کیا گیا جس میں شرکا نے گہری دلچسپی کا اظہار کیا۔ واضح رہے کہ یہ تقریب گذشتہ سال بھی پولینڈ کے سفارت خانے میں منعقد کی گئی تھی جس میں برطانوی ہائی کمشنر کے علاوہ درجنوں سفیروں نے شرکت کی تھی