رحیم یار خان کے علاقے جمال الدین والی میں کارکنوں سے خطاب کرتے ہوئے صدر مملکت آصف علی زرداری نے کہا کہ انہوں نے طویل عرصہ جیل میں گزارا لیکن کبھی حوصلہ نہیں ہارا، جبکہ آج بعض سیاسی رہنما ڈیڑھ سال بھی جیل میں نہیں رہ پاتے اور شور مچانا شروع کر دیتے ہیں۔
صدر زرداری نے کہا، “میں نے 14 سال جیل کاٹی ہے۔ میں پہلے بھی کہہ چکا ہوں کہ دو سال بعد جیل خود پوچھتی ہے۔ لیکن آج کے لیڈر ایسے ہیں کہ ڈیڑھ سال بھی مکمل نہیں ہوتا اور واویلا شروع ہو جاتا ہے۔”
انہوں نے جمہوریت کے حوالے سے کہا کہ کسی بھی جمہوری نظام میں ہتھیار اٹھانے کی اجازت نہیں دی جاتی۔ ان کے مطابق تشدد کا راستہ اختیار کرنے سے سب سے زیادہ نقصان اپنے ہی لوگوں کا ہوتا ہے۔
صدر زرداری کا کہنا تھا کہ قربانی دینے کے لیے حوصلہ اور صبر درکار ہوتا ہے۔ “میں نے مشکلات برداشت کیں، تکلیفیں سہیں، مگر ہمت نہیں ہاری۔”
انہوں نے مزید کہا کہ جیل انسان کو صبر اور عبادت کا موقع دیتی ہے، اور وہاں کی گئی دعا قبول بھی ہوتی ہے۔
خطاب کے اختتام پر انہوں نے سیاسی عزم کا اظہار کرتے ہوئے کہا کہ وہ پورے پاکستان میں اپنی جماعت کو مضبوط کریں گے اور ملک کی تعمیر و ترقی کے لیے جدوجہد جاری رکھیں گے۔ ساتھ ہی انہوں نے کہا کہ مستقبل میں وزیر اعظم بلاول بھٹو زرداری ہوں گے۔