ہالی ووڈ کی معروف فلم ’گریز ایناٹمی‘ کے اداکار ایرک ڈین 53 سال کی عمر میں لاعلاج بیماری سے لڑتے ہوئے جان کی بازی ہار گئے۔
بین الاقوامی میڈیا کے مطابق ایرک ڈین طویل عرصے سے ’ایمیوٹروپک لیٹرل سکلروسیس‘ (اے ایل ایس) نامی لاعلاج بیماری میں مبتلا تھے۔
ایرک ڈین کے ترجمان میلیسا بینک نے 19 فروری کو ’یو ایس اے ٹو ڈے‘ کو بتایا کہ ڈین کا انتقال ہو گیا ہے، بیان میں بتایا گیا ہے کہ وہ اپنے قریبی دوستوں، بیوہ ریکبیکا گائے ہارٹ اور اپنی 2 بیٹیوں بلی اور جارجیا کو بطور سوگواران چھوڑ گئے ہیں۔
بیان میں کہا گیا تھا کہ بیماری کے دوران ایرک ڈین نے آگاہی اور تحقیق کے لیے بھرپور آواز اٹھائی اور وہ اپنے مداحوں کے محبت بھرے تعاون کے شکر گزار رہے۔
ایرک ڈین نے اپنے کیریئر میں سیریز بریلینٹ مائنڈز میں ایک فائر فائٹر کا کردار ادا کیا تھا، اس کردار کو بھی فلم میں اے ایل ایس سے متاثرہ دکھایا گیا تھا۔
ایرک ڈین کو سب سے زیادہ شہرت فلم ’گریز ایناٹمی‘ سے ملی تھی، اُنہوں نے ایچ بی او کے شو ’یو فوریا‘ میں کال جیکب کے کردار سے بھی خوب شہرت حاصل کی۔
واضح رہے کہ گزشتہ سال ایک انٹرویو میں ایرک ڈین نے بتایا تھا کہ ان میں اے ایل ایس نامی لاعلاج بیماری کی تشخیص ہوئی ہے اور بعد میں انہیں متعدد پیچیدگیوں کے ساتھ ساتھ ایک بازو کے کام نہ کرنے جیسے مسائل کا سامنا بھی کرنا پڑا تھا۔
