سعودی عرب میں رمضان المبارک کے آخری عشرے کی روح پرور ساعتوں کے پیش نظر حرمین شریفین میں اعتکاف کے لیے رجسٹریشن کا باقاعدہ آغاز کر دیا گیا ہے۔
ادارہ امور حرمین شریفین کے مطابق مسجد الحرام اور مسجد نبوی ﷺ میں اعتکاف کی سعادت حاصل کرنے کے خواہشمند افراد کے لیے آن لائن رجسٹریشن کی سہولت فراہم کر دی گئی ہے۔
ادارے کا کہنا ہے کہ معتکفین کو سرکاری ویب سائٹ پر جا کر اپنا اکاؤنٹ بنانا ہوگا۔ جن افراد کا پہلے سے اکاؤنٹ موجود ہے وہ اسی کے ذریعے لاگ اِن کر کے درخواست جمع کرا سکتے ہیں۔
اعلامیے کے مطابق مسجد الحرام اور مسجد نبوی میں اعتکاف کا آغاز 20 رمضان المبارک سے ہوگا، جہاں دنیا بھر سے آنے والے ہزاروں مسلمان آخری عشرے کی بابرکت ساعتیں عبادت و ریاضت میں گزاریں گے۔
رمضان کے آخری ایام میں حرمین شریفین کا روحانی منظر ایمان افروز ہوتا ہے، اور اعتکاف کے لیے رجسٹریشن کا آغاز ان مبارک لمحات کی تیاری کا پہلا قدم سمجھا جا رہا ہے۔