اداکارہ تاپسی پنوں نے حال ہی میں کنگنا رناوت کے ساتھ اپنے پرانے تنازع پر بات کرتے ہوئے کہا ہے کہ وہ ان کے ساتھ دوستی کے لیے تیار ہیں۔
ایک انٹرویو میں تاپسی نے کہا کہ سوشل میڈیا پر سامنے آنے والے جھگڑے اور خبروں کے باوجود ان کا کنگنا کے ساتھ کبھی برا ٹکراؤ نہیں ہوا۔ تاہم انہوں نے تسلیم کیا کہ عوامی سطح پر چھوٹی نوک جھونک سے کسی نہ کسی کو فائدہ ضرور پہنچا ہوگا۔
تاپسی نے یاد دہانی کروائی کہ ایک موقع پر رنگولی چنڈیل نے انہیں “کنگنا کی سستی کاپی” کہا تھا، جس پر انہوں نے جواب دیا کہ چونکہ میں کنگنا جتنی دولت نہیں کماتی، اس لیے مجھے سستی کہنا درست نہیں، لیکن میں نے کبھی کنگنا کے خلاف کچھ نہیں کہا اور اس بات کو سنجیدگی سے نہیں لیا۔
تاپسی سے یہ بھی سوال کیا گیا کہ فلم انڈسٹری میں اسٹار کڈز کو ترجیح دینے کے معاملے پر ان کا اور کنگنا کا مؤقف مختلف تھا، اور اس جھگڑے سے کسی کو فائدہ ہوا ہوگا یا نہیں۔ انہوں نے جواب دیا کہ یہ معلوم نہیں، مگر کسی نہ کسی کو ضرور فائدہ ہوا ہوگا۔
اداکارہ نے واضح کیا کہ وہ اس معاملے کو ختم کرنے کے لیے تیار ہیں اور دوستی کے لیے پرعزم ہیں۔
یاد رہے کہ 2020 میں تاپسی اور کنگنا کے درمیان سوشل میڈیا پر کھلی جنگ دیکھنے میں آئی تھی۔ اس دوران کنگنا نے تاپسی اور سوارا بھاسکر کو “بی گریڈ اداکارائیں” اور “ضرورت مند آؤٹ سائیڈرز” قرار دیا تھا۔
اس کے جواب میں تاپسی نے ٹوئٹ کیا تھا کہ فلم انڈسٹری میں تقسیم یا حکمرانی کی پالیسی اپنانے کی کوشش کی جا رہی ہے، لیکن ہم ایک بہتر نظام کے لیے جدوجہد کر رہے ہیں تاکہ سب ساتھ رہ سکیں، کیچڑ اچھالنے اور نام رکھنے کے بجائے۔