امریکا نے پاکستان میں آئی ٹی، مائننگ، معدنیات اور توانائی جیسے شعبوں میں سرمایہ کاری میں دلچسپی کا اظہار کیا ہے اور دونوں ممالک نے بڑے منصوبوں میں سرمایہ کاری کے حوالے سے مزید روابط برقرار رکھنے پر اتفاق کیا ہے۔
وفاقی وزارت خزانہ کے اعلامیے کے مطابق، وفاقی وزیر خزانہ محمد اورنگزیب نے اپنے واشنگٹن دورے کے دوران امریکی سیکریٹری کامرس ہاورڈ لٹنک سے ملاقات کی، جس میں دونوں رہنماؤں نے تجارت اور سرمایہ کاری کے فروغ پر تفصیلی تبادلہ خیال کیا۔
اعلامیے میں بتایا گیا کہ دونوں ممالک نے اقتصادی تعاون کو مزید بڑھانے کے عزم کا اعادہ کیا اور یو ایس پاکستان ٹریڈ اینڈ انویسٹمنٹ فورم کے 31 مارچ 2026 کو انعقاد کو سراہا، جس میں دونوں ممالک کی معروف کمپنیوں اور وزارتی سطح کی شرکت متوقع ہے۔
وزارت خزانہ نے مزید کہا کہ ملاقات کے دوران پاکستان اور امریکا نے بڑے ترقیاتی منصوبوں میں سرمایہ کاری کے لیے تعلقات مضبوط بنانے اور مستقبل میں مزید مواقع پر تبادلہ خیال جاری رکھنے پر اتفاق کیا۔ یہ اقدام دونوں ممالک کے اقتصادی روابط کو مضبوط کرنے اور پاکستان میں سرمایہ کاری کے فروغ میں اہم قدم قرار دیا جا رہا ہے۔