ایران نے امریکا کو یورینیم کی افزودگی 60 فیصد سے کم کر کے 3.6 فیصد تک لانے اور اسے سات سال تک معطل رکھنے کی پیشکش کر دی ہے۔
ایک عرب سفارت کار نے اسرائیلی میڈیا کو بتایا کہ ایران نے اس مقصد کے لیے معاہدے کا مجوزہ مسودہ بھی امریکا کے سامنے رکھا ہے۔ ایرانی مسودے کے مطابق ملک اپنے موجودہ جوہری پروگرام میں انتہائی افزودہ یورینیم کو 3.6 فیصد تک ڈائلیوٹ کرے گا اور سات سال تک مزید افزودگی نہیں کرے گا۔
تاہم، اسرائیلی میڈیا کے مطابق امریکا اس وقت ایران سے صفر افزودگی کا مطالبہ نہیں کر رہا، لیکن موجودہ ذخیرہ کو بیرون ملک منتقل کرنے کی درخواست کر رہا ہے۔ ایران نے یہ مطالبہ مسترد کر دیا ہے، لیکن وہ انتہائی افزودہ یورینیم کو ڈائلیوٹ کرنے کے لیے تیار ہے۔
اسرائیلی میڈیا کا مزید کہنا ہے کہ امریکا ایران کے جوہری پروگرام کو کم از کم دس سال تک معطل کرنے کا خواہاں ہے، اور ایرانی پیشکش اس وقت کے امریکی مطالبات کو مکمل طور پر پورا نہیں کرتی۔ اس تناظر میں، ایران کے خلاف امریکی فوجی کارروائی کے خدشات قریبی مدت میں دوبارہ بڑھ سکتے ہیں۔
یہ پیشرفت ایران اور امریکا کے درمیان جاری جوہری مذاکرات میں ایک اہم موڑ کے طور پر دیکھی جا رہی ہے، جس میں بین الاقوامی سلامتی اور خطے کی سیاسی صورتحال پر براہ راست اثرات مرتب ہو سکتے ہیں۔