دبئی (ویب ڈیسک) نئی عمارتوں کے حفاظتی قانون کی منظوری دے دی گئی۔ حکام کے مطابق عمارتوں کے حفاظتی قانون کی خلاف ورزی پر جرمانہ 2 ملین درہم تک ہوگا، جبکہ عمارتوں میں حفاظتی معائنہ اور معیار کا تصدیقی سرٹیفکیٹ لازمی قرار دیدیا گیا۔

دبئی کے حکمران شیخ محمد بن راشد المکتوم نے قانون جاری کیا ہے۔ نئے قانون کا مقصد رہائشیوں کی حفاظت یقینی بنانا اور حادثات میں کمی لانا ہے، بلدیہ دبئی عمارتوں کے معائنے اور حفاظتی ریکارڈ کی نگرانی کرے گی۔حکام کے مطابق نیا قانون قدیم عمارتوں اور انڈپینڈنٹ اکنامک زونز جیسے دبئی انٹرنیشنل فنانشل سینٹر پر بھی لاگو ہوں گے۔ قانون میں مزید کہا گیا ہے کہ عمارت کے مالکان کو لائسنس یافتہ انجینئرنگ کمپنی سے تکنیکی رپورٹ اور مرمت کروانا لازمی ہوگا۔

حکام کے مطابق بلڈنگ سیفٹی لاء کیخلاف ورزی کرنے والے افراد یا کمپنیوں کو 1 لاکھ سے 10 لاکھ درہم جرمانہ ہوگا اور دوبارہ خلاف ورزی پر 20 لاکھ درہم تک جرمانہ ہوگا۔