افغانستان کی نیشنل ریزسٹنس فرنٹ کے سربراہ احمد مسعود نے کہا ہے کہ طالبان نے دہشت گرد گروہوں کی حمایت کے لیے افغان عوام کو قربان کر دیا ہے۔

انہوں نے یہ بات جمعہ کے روز اسلامی وحدت پارٹی افغانستان کے سابق رہنما عبدالعلی مزاری کی شہادت کی 31ویں برسی کے موقع پر منعقدہ تقریب سے خطاب کرتے ہوئے کہی۔

احمد مسعود کا کہنا تھا کہ طالبان نے القاعدہ، تحریک طالبان پاکستان (ٹی ٹی پی)، جیش العدل، انصاراللہ اور دیگر دہشت گرد تنظیموں کو محفوظ پناہ گاہیں فراہم کر کے افغانستان کو سیکیورٹی اور جیوپولیٹیکل کھیلوں کا میدان بنا دیا ہے۔

پاکستانی فوج کی جانب سے افغان سرزمین پر حملوں کا حوالہ دیتے ہوئے انہوں نے کہا کہ موجودہ صورتحال دراصل طالبان کے غیر ذمہ دارانہ اقدامات اور دہشت گرد تنظیموں کی حمایت کا نتیجہ ہے۔

انہوں نے مزید کہا کہ آج کے بحران اور ماضی کے تمام بحرانوں کی بنیادی وجہ طالبان ہیں۔ دہشت گرد گروہوں کو پناہ دینا، ٹی ٹی پی اور دیگر تنظیموں کو سہولت فراہم کرنا، جیش العدل اور تاجکستان کی انصاراللہ جیسی تنظیموں کو محفوظ ٹھکانے دینا اور القاعدہ سمیت دیگر گروہوں کو پناہ دینا ہی وہ عوامل ہیں جنہوں نے افغانستان کو مسلسل سیکیورٹی مسائل اور جیوپولیٹیکل کشمکش میں دھکیل دیا ہے۔

ان کے مطابق اس میں کوئی شک نہیں کہ آج جو جنگ اور کشیدگی دیکھنے میں آ رہی ہے وہ انہی غیر دانشمندانہ اقدامات کا نتیجہ ہے۔