بالی ووڈ کے اسٹار جوڑے رنویر سنگھ اور دپیکا پڈوکون کی ایک تصویر سوشل میڈیا پر وائرل ہو گئی ہے، جو فلم ’دھرندھر 2‘ کی حالیہ کامیابی کے بعد ممبئی میں ایک ریسٹورنٹ میں کھینچی گئی تھی۔
تصویر میں رنویر اور دپیکا ایک سادہ اور پُرسکون وقت گزارتے ہوئے نظر آ رہے ہیں، جہاں وہ عملے کے ساتھ پوز دیتے دکھائی دیے۔ ان کے ساتھ رنویر کے والد جگجیت سنگھ بھاونانی بھی موجود تھے۔
40 سالہ رنویر نے سیاہ ٹی شرٹ، سفید کیپ اور سن گلاسز پہن رکھی تھی اور سیلفی لیتے ہوئے نظر آئے، جبکہ 40 سالہ دپیکا مسکرا رہی تھیں اور پیس سائن بنا رہی تھیں۔ جگجیت سنگھ بھاونانی ان کے پیچھے کھڑے تھے، جس نے تصویر کو مزید دلکش بنایا۔
رنویر سنگھ حال ہی میں فلم ’دھرندھر 2‘ میں نظر آئے، جو 19 مارچ کو ریلیز ہوئی۔ اس فلم میں انہوں نے بھارتی جاسوس کا کردار ادا کیا، جس میں وہ کراچی کے علاقے لیاری میں کسی مشن پر بھیجے گئے تھے۔
دپیکا پڈوکون نے آخری بار فلم ’سنگھم اگین‘ میں کام کیا تھا اور اب وہ شاہ رخ خان کے ساتھ فلم ’کنگ‘ کی تیاری کر رہی ہیں۔ اس کے علاوہ وہ ہدایتکار اٹلی کے نئے پراجیکٹ میں ساؤتھ کے سپر اسٹار الو ارجن کے ساتھ بھی جلوہ گر ہوں گی۔