پاکستان سپر لیگ کے تیسرے میچ میں راولپنڈیز نے پشاور زلمی کے خلاف ٹاس جیت کر پہلے بیٹنگ کرنے کا فیصلہ کیا ہے، جس کے بعد ایک سنسنی خیز مقابلے کی توقع کی جا رہی ہے۔
قذافی اسٹیڈیم میں جاری اس میچ میں راولپنڈیز کے کپتان محمد رضوان کا کہنا تھا کہ پچ بیٹنگ کے لیے سازگار دکھائی دے رہی ہے، تاہم بعد میں اس کے رویے میں تبدیلی آ سکتی ہے۔ انہوں نے ٹیم میں نئی شمولیتوں کا ذکر کرتے ہوئے کہا کہ اسکواڈ میں کچھ تبدیلیاں ہیں اور فاسٹ بولر زمان خان کی کمی محسوس کی جائے گی۔
محمد رضوان نے واضح انداز میں کہا کہ وہ بطور اوپنر ہی میدان میں اتریں گے اور ہمیشہ ٹیم کی ضرورت کے مطابق کھیلنے کو ترجیح دیتے ہیں۔
دوسری جانب پشاور زلمی کے کپتان بابر اعظم نے بھی اوپننگ جاری رکھنے کے عزم کا اظہار کیا۔ ان کا کہنا تھا کہ پچ خشک دکھائی دے رہی ہے اور امکان ہے کہ دونوں اننگز میں یکساں رویہ برقرار رکھے گی، جس سے مقابلہ متوازن رہ سکتا ہے۔
میچ کے آغاز سے قبل دونوں ٹیموں کے کپتانوں کے بیانات نے شائقین میں جوش و خروش بڑھا دیا ہے، اور امید کی جا رہی ہے کہ میدان میں ایک سخت اور دلچسپ مقابلہ دیکھنے کو ملے گا۔