میرپور میں وفاقی وزیر امور کشمیر، گلگت بلتستان و سفران، انجینئر امیر مقام نے منگلا ڈیم ریزنگ پراجیکٹ کے تحت تعمیر ہونے والے رٹھوعہ ہریام پل کا تفصیلی معائنہ کیا۔ اس موقع پر پراجیکٹ ڈائریکٹر انجینئر انعام الحق نے وزیر کو پل کے تعمیراتی پراگرس اور دیگر تکنیکی پہلوؤں پر بریفنگ دی۔
رٹھوعہ ہریام پل گزشتہ 20 سال سے زیر التواء تھا، اور وفاقی وزیر نے میرپور سے اسلام گڑھ تک پیدل اور گاڑی میں سفر کرتے ہوئے پل اور اس کے اطراف کے کام کا جائزہ لیا۔ وزیر نے وفاقی حکومت اور FWO سمیت تعمیراتی فرم کی کارکردگی کو سراہا اور وزیراعظم میاں محمد شہباز شریف کی طرف سے اہلِ آزاد جموں و کشمیر اور بالخصوص میرپور کے باشندوں کو پاکستان کے سب سے بڑے پل کی تکمیل پر مبارکباد دی۔
پل کی تعمیر پر تقریباً 10 ارب روپے لاگت آئی، اور اس منصوبے کی تکمیل سے میرپور اور اسلام گڑھ کے درمیان فاصلہ 30 کلومیٹر سے کم ہو کر صرف 7 کلومیٹر رہ جائے گا، جس سے ضلع کوٹلی، سماہنی، اسلام گڑھ، چکسواری، ڈڈیال اور دیگر علاقوں میں آمد و رفت آسان ہوگی، اور لاکھوں افراد کے وقت، ٹرانسپورٹ اور فیول کی بچت ہوگی۔
وزیر امور کشمیر نے کہا کہ منگلا ڈیم پاکستان کی معاشی و اقتصادی ترقی کے لیے اہم منصوبہ ہے اور رٹھوعہ ہریام پل کی بروقت تکمیل میں وزیراعظم شہباز شریف کی ذاتی دلچسپی اور FWO کی محنت نمایاں رہی۔ انہوں نے کہا کہ پل مارچ 2026 میں جزوی طور پر مکمل ہو گیا اور 31 مارچ 2027 تک تزئین و آرائش سمیت مکمل منصوبہ مکمل ہو جائے گا۔
اس موقع پر مسلم لیگ ن آزاد کشمیر کی قیادت، سابق وزراء، افسران اور FWO کے انجینئرز بھی موجود تھے، جنہوں نے منصوبے کی پیش رفت کا جائزہ لیا اور اس کی کامیابی پر وفاقی وزیر کو بریفنگ دی۔