خیبر پختونخوا میں وطن کے دفاع کے دوران جامِ شہادت نوش کرنے والے پاک فوج کے بہادر سپوتوں کو خراجِ عقیدت (Tribute) پیش کرنے کے لیے پشاور گیریژن میں ایک باوقار تقریب منعقد کی گئی۔ اس تقریب کا مقصد شہداء کی لازوال قربانیوں کو یاد کرنا اور ان کے اہلِ خانہ کے ساتھ اظہارِ یکجہتی کرنا تھا۔

تقریب کے موقع پر شہداء کے لواحقین نے پشاور پہنچ کر یادگارِ شہداء پر حاضری دی، پھول چڑھائے اور اپنے پیاروں کے درجات کی بلندی کے لیے خصوصی دعا کی۔ فضا عقیدت، احترام اور جذبۂ حب الوطنی سے سرشار تھی۔

تقریب میں کور کمانڈر پشاور نے بطورِ مہمانِ خصوصی شرکت کی۔ انہوں نے شہداء کے اہلِ خانہ سے فرداً فرداً ملاقات کی، ان کے حوصلے کو سراہا اور اس عزم کا اعادہ کیا کہ قوم اپنے شہداء کی قربانیوں کو کبھی فراموش نہیں کرے گی۔ ان کا کہنا تھا کہ شہداء کی قربانیاں پاکستان کے امن اور استحکام کی بنیاد ہیں۔

مزید پڑھیں:نیشنل ورکشاپ بلوچستان کا پشاور دورہ: سکیورٹی اقدامات پر بریفنگ، شہداء کو خراجِ عقیدت

تقریب کے دوران خصوصی ویڈیوز اور دستاویزی فلمیں بھی پیش کی گئیں، جن میں شہداء کی پیشہ ورانہ مہارت، فرض شناسی اور وطن سے بے لوث محبت کو اجاگر کیا گیا۔ ان مناظر نے شرکاء کو جذباتی کر دیا اور شہداء کی عظمت کو مزید نمایاں کیا۔

تقریب کے اختتام پر کور کمانڈر نے شہداء کو بھرپور خراجِ تحسین پیش کیا اور لواحقین کی شرکت پر ان کا شکریہ ادا کیا۔ یہ تقریب اس عزم کی تجدید تھی کہ قوم اپنے ہیروز کی قربانیوں کو ہمیشہ یاد رکھے گی اور ان کے نقشِ قدم پر چلنے کی کوشش جاری رکھے گی۔