وزارت داخلہ پاکستان (Ministry of Interior of Pakistan) نے قومی اسمبلی میں اعتراف کیا ہے کہ شناختی کارڈز اور دیگر سرکاری دستاویزات کی چھپائی پر ہونے والے اخراجات، حاصل ہونے والی آمدن سے زیادہ رہے ہیں۔

قومی اسمبلی اجلاس میں پیش کی گئی تفصیلات کے مطابق شناختی کارڈ، فیملی رجسٹریشن سرٹیفکیٹ (FRC)، ڈیتھ سرٹیفکیٹ اور دیگر دستاویزات کی فیس کی مد میں مجموعی طور پر 26 ارب 66 کروڑ روپے سے زائد رقم وصول کی گئی۔

مزید پڑھیں؛انمول عرف پنکی کیس: 9 منشیات مقدمات میں جوڈیشل ریمانڈ کا فیصلہ کالعدم

تاہم سرکاری دستاویزات کے مطابق ان دستاویزات کی تیاری اور چھپائی پر مجموعی اخراجات 36 ارب 80 کروڑ روپے سے زیادہ رہے، جس کے باعث وزارت کو مالی دباؤ کا سامنا کرنا پڑا۔

اجلاس میں یہ بھی بتایا گیا کہ گزشتہ تین برسوں کے دوران 38 ہزار 159 خصوصی افراد کو مفت شناختی کارڈ جاری کیے گئے، جبکہ 3 ہزار 70 یتیم بچوں کو رجسٹریشن سے متعلق دستاویزات بلا معاوضہ فراہم کی گئیں۔

حکام کے مطابق حکومت عوام کو بنیادی شناختی سہولیات کی فراہمی یقینی بنانے کے لیے مختلف فلاحی اقدامات جاری رکھے ہوئے ہے، خصوصاً ایسے طبقات کے لیے جو مالی مشکلات کا سامنا کرتے ہیں۔