ایران (Iran) کی پاسدارانِ انقلاب (Islamic Revolutionary Guard Corps – IRGC) نے دعویٰ کیا ہے کہ انہوں نے جمعرات کی صبح ایک امریکی فضائی اڈے کو نشانہ بنایا ہے۔ ایرانی حکام کے مطابق یہ کارروائی بندر عباس (Bandar Abbas) پورٹ کے قریب مبینہ امریکی حملے کے جواب میں کی گئی۔

ایرانی خبر رساں ادارے تسنیم نیوز ایجنسی (Tasnim News Agency) کے مطابق پاسدارانِ انقلاب (IRGC) نے اپنے بیان میں کہا کہ مقامی وقت کے مطابق صبح 4 بج کر 50 منٹ پر امریکی ائیر بیس پر حملہ کیا گیا۔

تاہم ایرانی حکام کی جانب سے یہ واضح نہیں کیا گیا کہ حملہ کس امریکی فوجی اڈے پر کیا گیا، جبکہ دوسری جانب کویت (Kuwait) نے دعویٰ کیا ہے کہ جمعرات کی صبح اس کی جانب میزائل اور ڈرون حملے کیے گئے ہیں۔

پاسدارانِ انقلاب (IRGC) نے اپنے بیان میں خبردار کیا کہ اگر ان کے بقول جارحیت دوبارہ دہرائی گئی تو ایران (Iran) اس کا مزید سخت اور فیصلہ کن جواب دے گا۔ بیان میں مزید کہا گیا کہ ممکنہ نتائج کی مکمل ذمہ داری جارح فریق پر عائد ہوگی۔

ادھر کویتی فوج (Kuwaiti Army) کے سرکاری ایکس اکاؤنٹ پر جاری بیان میں کہا گیا کہ ملک کا فضائی دفاعی نظام دشمن کے میزائل اور ڈرون حملوں کو ناکام بنانے میں مصروف ہے۔

مزیدپڑھیں:پنجاب اور خیبرپختونخوا شدید گرمی کی لپیٹ میں، بارش اور گرد آلود ہواؤں کی پیشگوئی

پاکستانی وقت کے مطابق صبح 7 بج کر 40 منٹ پر جاری بیان میں شہریوں کو بتایا گیا کہ اگر دھماکوں کی آوازیں سنائی دیں تو وہ فضائی دفاعی نظام کی کارروائی کا نتیجہ ہیں، جو دشمن کے حملوں کو روکنے کے لیے کی جا رہی ہے۔

کویتی فوج (Kuwaiti Army) نے عوام سے اپیل کی کہ وہ متعلقہ اداروں کی جانب سے جاری کردہ حفاظتی اور سکیورٹی ہدایات پر مکمل عمل کریں۔

تاحال یہ واضح نہیں ہو سکا کہ ایران (Iran) کی پاسدارانِ انقلاب (IRGC) کی جانب سے کیے گئے دعوے اور کویت (Kuwait) میں رپورٹ ہونے والے حملوں کے درمیان کوئی براہِ راست تعلق موجود ہے یا نہیں۔