معروف یوٹیوبر جمی ڈونلڈسن عرف مسٹر بیسٹ(Mr beast) نے یوٹیوب کی تاریخ میں ایک بڑا ریکارڈ قائم کر دیا ہے۔ وہ دنیا کے پہلے ایسے انفرادی کریئیٹر بن گئے ہیں جنہوں نے پانچ سو ملین سبسکرائبرز کا سنگ میل عبور کیا ہے۔
یہ کامیابی ان کے اس طویل سفر کا نتیجہ ہے جو انہوں نے صرف 13 سال کی عمر میں 2012 میں شروع کیا تھا، جب وہ عام گیمنگ ویڈیوز اور انٹرنیٹ ری ایکشنز بنایا کرتے تھے، مگر وقت کے ساتھ ان کا کانٹینٹ پوری دنیا میں ایک بڑے تفریحی برانڈ میں تبدیل ہو گیا۔
مسٹر بیسٹ کی مقبولیت کا اصل راز ان کے بڑے اور منفرد ویڈیو پروجیکٹس ہیں، جن میں مہنگے اور حیرت انگیز چیلنجز شامل ہوتے ہیں۔
ان کی مشہور ویڈیو ’چار لاکھ 56 ہزار ڈالر والا سکوئڈ گیم حقیقی زندگی میں‘ ان کے کیریئر کا اہم موڑ ثابت ہوئی، جو تقریباً ایک ارب ویوز کے قریب پہنچ چکی ہے۔ اس کے علاوہ ان کے بڑے مقابلے جیسے ’پچاس یوٹیوبرز ایک ملین ڈالر کے لیے لڑتے ہیں‘ اور 2026 کا لائیو سٹریم ’پچاس سٹریمرز ایک ملین ڈالر کے لیے لڑتے ہیں‘ بھی دنیا بھر میں بے حد مقبول ہوئے۔
ان کے کام کی ایک خاص بات یہ بھی ہے کہ وہ صرف تفریح تک محدود نہیں رہے بلکہ فلاحی کاموں میں بھی بڑے پیمانے پر حصہ لیتے ہیں۔
مزیدپڑھیں:عمران خان کو اسپتال میں طبی معائنے کے بعد دوبارہ اڈیالہ منتقل کردیا گیا: چیئرمین پی ٹی آئی
انہوں نے ’ٹیم ٹریز‘ مہم کے ذریعے 25 ملین ڈالر سے زیادہ رقم جمع کر کے 25 ملین سے زائد درخت لگائے۔ بعد میں ’ٹیم سیز‘ مہم میں 30 ملین ڈالر سے زیادہ جمع کر کے سمندروں اور دریاؤں سے کچرا صاف کرنے کا بڑا منصوبہ شروع کیا۔
سنہ 2025 میں انہوں نے ’ٹیم واٹر‘ مہم شروع کی جس میں دنیا بھر کے کریئیٹرز نے حصہ لیا اور چالیس ملین ڈالر اکٹھے کیے تاکہ صاف پانی کے منصوبوں میں مدد دی جا سکے۔
مسٹر بیسٹ کے 500 ملین سبسکرائبرز صرف ایک چینل کی کامیابی نہیں بلکہ ان کے مختلف چینلز اور عالمی سطح پر پھیلاؤ کا نتیجہ ہیں۔ یہ تعداد دنیا کے کئی ممالک کی مجموعی آبادی سے بھی زیادہ ہے، جو اس بات کو ظاہر کرتی ہے کہ وہ ڈیجیٹل دنیا میں کتنے بڑے اثر و رسوخ کے مالک بن چکے ہیں۔ یوٹیوب کی تاریخ میں یہ لمحہ ایک سنگ میل سمجھا جا رہا ہے، کیونکہ اب یوٹیوب کریئیٹرز بھی بڑے میڈیا نیٹ ورکس کے برابر پہنچ چکے ہیں۔
اگرچہ ان کی کامیابیوں کے ساتھ کچھ تنقید بھی جڑی رہی ہے، لیکن ان کی مقبولیت اور اثر و رسوخ میں کوئی کمی نہیں آئی۔ آج مسٹر بیسٹ نہ صرف یوٹیوب کے سب سے بڑے نام ہیں بلکہ وہ اس بات کی بھی مثال ہیں کہ ایک عام نوجوان اپنی محنت اور منفرد سوچ کے ذریعے دنیا بھر میں پہچان بنا سکتا ہے۔
