وفاقی حکومت نے پیٹرولیم مصنوعات کی قیمتوں میں اضافے کا باضابطہ اعلان کرتے ہوئے نئی قیمتوں کا نوٹیفکیشن جاری کر دیا ہے۔ عالمی منڈی میں خام تیل کی قیمتوں میں اتار چڑھاؤ اور دیگر معاشی عوامل کے پیشِ نظر پیٹرول اور ہائی اسپیڈ ڈیزل دونوں کی قیمتوں میں اضافہ کیا گیا ہے۔

حکومت کی جانب سے جاری کردہ نوٹیفکیشن کے مطابق پیٹرول کی قیمت میں 4 روپے 93 پیسے فی لیٹر اضافہ کیا گیا ہے، جس کے بعد پیٹرول کی نئی قیمت 320 روپے 73 پیسے فی لیٹر مقرر کر دی گئی ہے۔

اسی طرح ہائی اسپیڈ ڈیزل کی قیمت میں 7 روپے 15 پیسے فی لیٹر اضافہ کیا گیا ہے، جس کے بعد ڈیزل کی نئی قیمت367روپے 21 پیسے مقرر کردی گئی ہے۔ نئی قیمتوں کا اطلاق فوری طور پر کر دیا گیا ہے۔

حکومتی اعلامیے کے مطابق پیٹرولیم مصنوعات کی قیمتوں میں ردوبدل آئل اینڈ گیس ریگولیٹری اتھارٹی (اوگرا) کی سفارشات اور عالمی مارکیٹ میں خام تیل کی قیمتوں کے رجحان کو مدنظر رکھتے ہوئے کیا گیا ہے۔

ماہرین کے مطابق پیٹرول اور ڈیزل کی قیمتوں میں اضافے کے باعث ٹرانسپورٹ، زرعی شعبے اور اشیائے ضروریہ کی ترسیل کے اخراجات میں مزید اضافہ ہونے کا امکان ہے، جس کے اثرات مہنگائی کی مجموعی شرح پر بھی مرتب ہو سکتے ہیں۔

پیٹرول کی قیمت میں اضافے سے موٹر سائیکل، کار اور دیگر نجی گاڑیوں کے صارفین پر اضافی مالی بوجھ پڑے گا، جبکہ ڈیزل مہنگا ہونے سے مال بردار گاڑیوں، پبلک ٹرانسپورٹ اور زرعی مشینری کے اخراجات میں بھی اضافہ متوقع ہے۔

حکومت کا کہنا ہے کہ پیٹرولیم مصنوعات کی قیمتوں کا تعین عالمی منڈی کی صورتحال اور درآمدی لاگت کو مدنظر رکھتے ہوئے کیا جاتا ہے، جبکہ آئندہ بھی عالمی تیل مارکیٹ میں ہونے والی تبدیلیوں کے مطابق قیمتوں پر نظرثانی کی جاتی رہے گی۔