پاکستان میں جدید موبائل ٹیکنالوجی کے استعمال میں نمایاں اضافہ دیکھنے میں آ رہا ہے۔ پاکستان ٹیلی کمیونیکیشن اتھارٹی (پی ٹی اے) کی تازہ ترین رپورٹ کے مطابق ملک میں 5G صارفین کی تعداد 10 لاکھ 78 ہزار سے تجاوز کر گئی ہے، جبکہ گزشتہ چار ماہ کے دوران لاکھوں نئے صارفین اس سروس سے منسلک ہوئے ہیں۔

پی ٹی اے کی جانب سے جاری کردہ دستاویز کے مطابق صرف چار ماہ کے عرصے میں 8 لاکھ 79 ہزار نئے صارفین 5G سروس کے سبسکرائبرز بنے، جو ملک میں جدید موبائل ٹیکنالوجی کی بڑھتی ہوئی مقبولیت کی عکاسی کرتا ہے۔

رپورٹ کے مطابق مارچ میں 5G صارفین کی تعداد صرف 71 ہزار تھی، تاہم اپریل میں یہ تعداد بڑھ کر2 لاکھ 98 ہزار تک پہنچ گئی، جس سے اس نئی ٹیکنالوجی کی تیزی سے بڑھتی ہوئی قبولیت کا اندازہ لگایا جا سکتا ہے۔

اسی طرح مئی کے دوران صارفین کی تعداد مزید بڑھ کر5 لاکھ 16 ہزار ہوگئی، جبکہ جون کے اختتام تک ملک میں 5G استعمال کرنے والوں کی تعداد9 لاکھ 65 ہزار سے تجاوز کر گئی۔

پی ٹی اے کے اعداد و شمار کے مطابق 6 جولائی تک ملک میں 5G صارفین کی مجموعی تعداد10 لاکھ 78 ہزار 534ریکارڈ کی گئی، جو گزشتہ چند ماہ کے مقابلے میں نمایاں اضافہ ہے۔

ماہرین کے مطابق 5G ٹیکنالوجی کی بڑھتی ہوئی دستیابی، جدید اسمارٹ فونز کا استعمال اور تیز رفتار انٹرنیٹ کی بڑھتی ہوئی طلب اس اضافے کی اہم وجوہات ہیں۔ ان کا کہنا ہے کہ آنے والے مہینوں میں بھی 5G صارفین کی تعداد میں مزید اضافہ متوقع ہے، کیونکہ ٹیلی کام کمپنیاں اپنی خدمات کو مزید وسعت دے رہی ہیں۔

پی ٹی اے کا کہنا ہے کہ ملک میں جدید ٹیلی کمیونیکیشن سہولیات کی فراہمی اور ڈیجیٹل رابطوں کو بہتر بنانا ادارے کی ترجیحات میں شامل ہے، جبکہ صارفین کو معیاری اور تیز رفتار موبائل انٹرنیٹ کی سہولت فراہم کرنے کے لیے مختلف اقدامات بھی جاری ہیں۔