اسلام آباد: پاکستان اینٹی کرپشن اکیڈمی (پاکا) نے قومی احتساب بیورو (نیب) اور دیگر قانون نافذ کرنے والے اداروں کے تفتیش کاروں اور پراسیکیوٹرز کی پیشہ ورانہ صلاحیتوں میں اضافے کے لیے 4 اور 5 اگست 2026 کو دو روزہ تربیتی و فکری مباحثے کا انعقاد کیا۔

تقریب کا افتتاح نیب کے چیئرمین لیفٹیننٹ جنرل (ر) نذیر احمد کی ہدایات پر پاکا کے ڈائریکٹر جنرل غلام صفدر شاہ نے کیا۔ مباحثے کا مقصد بدعنوانی، منی لانڈرنگ اور دہشت گردی کی مالی معاونت جیسے جرائم سے نمٹنے کے لیے ادارہ جاتی استعداد اور بین الادارہ تعاون کو بین الاقوامی معیار کے مطابق مزید مؤثر بنانا تھا۔

تربیتی پروگرام میں ملکی تحقیقات کو فنانشل ایکشن ٹاسک فورس (FATF) اوراقوام متحدہ کے کنونشن برائے انسداد بدعنوانی (UNCAC)** کے تقاضوں سے ہم آہنگ کرنے پر خصوصی توجہ دی گئی۔ شرکا کو جدید اثاثہ جات کی کھوج، فرانزک ٹیکنالوجی، انٹرپول اور گلوب ای نیٹ ورک سمیت بین الاقوامی تعاون کے مختلف نظاموں سے بھی آگاہ کیا گیا۔

تربیتی سیشنز کی قیادت نیب کے ڈائریکٹر جنرل اسپیشل انویسٹی گیشن ڈویژن محمد طاہر، نیکٹا کے ایڈیشنل ڈائریکٹر شہزاد حسین اور دیگر ماہرین نے کی۔ سیشنز میں متوازی مالیاتی تحقیقات، حقیقی ملکیت (Beneficial Ownership) کی شفافیت، اثاثوں کو بروقت منجمد کرنے کے طریقہ کار اور فنانشل مانیٹرنگ یونٹ (FMU) کی جانب سے مشکوک مالیاتی لین دین کی رپورٹس کے تجزیاتی کردار پر تفصیلی تبادلہ خیال کیا گیا۔

مزید پڑھیں:سندھ میں تمام بھرتیاں میرٹ پر، مفتاح کے صدر پر الزامات غیر ذمہ دارانہ، ضیا لنجار

پروگرام کے اختتام پر شرکا میں اسناد تقسیم کی گئیں۔ اس موقع پر ڈی جی پاکا غلام صفدر شاہ نے اس عزم کا اظہار کیا کہ اکیڈمی قانون نافذ کرنے والے، سلامتی اور ریگولیٹری اداروں کی پیشہ ورانہ تربیت، استعداد کار میں اضافے اور ادارہ جاتی تعاون کے فروغ کے لیے اپنی کوششیں جاری رکھے گی۔