بانی: عبداللہ بٹ      ایڈیٹرانچیف : عاقل جمال بٹ

بانی: عبداللہ بٹ

ایڈیٹرانچیف : عاقل جمال بٹ

 تازہ ترین

معروف سابق فٹبالر روبرٹو کارلوس کے اسلام قبول کرنے کی خبریں، حقیقت کیا ہے؟

برازیل کے سابق معروف فٹبالر روبرٹو کارلوس(Roberto Carlos) کے اسلام قبول کرنے کی خبریں ان دنوں ترک میڈیا اور سوشل میڈیا پر گردش کر رہی ہیں۔

ترکی کے کئی اخبارات جن میں ’حبرلر‘ بھی شامل ہے میں یہ دعویٰ کیا گیا ہے کہ 53 سالہ روبرٹو کارلوس نے تقریباً چار ہفتے قبل برازیل میں مسلم کمیونٹی کی معروف شخصیت شیخ جہاد حمادہ سے ملاقات کی تھی اور کلمہ پڑھ کر اسلام قبول کر لیا۔

بتایا گیا ہے کہ دونوں کے درمیان کچھ عرصے سے رابطہ تھا اور اس ملاقات سے پہلے بھی روبرٹو کارلوس شیخ حمادہ سے رابطے میں تھے۔


اس خبر کے سامنے آنے کی ایک اور بڑی وجہ یہ بتائی جا رہی ہے کہ حال ہی میں روبرٹو کارلوس کی شادی مراکش سے تعلق رکھنے والی فیفا کی لائسنس یافتہ فٹبال ایجنٹ سہیلہ الطاہری کے ساتھ ہوئی ہے۔ ان دونوں کی شادی کی تصاویر سوشل میڈیا پر کافی وائرل ہوئیں۔

رپورٹس کے مطابق ان کا رشتہ پہلے پیشہ ورانہ نوعیت کا تھا جو بعد میں ذاتی تعلق میں بدل گیا دونوں برازیل اور یورپ کے درمیان فٹبالرز کے کیریئر اور کاروباری معاملات سے متعلق مختلف منصوبوں میں بھی ایک ساتھ کام کرتے رہے ہیں۔


انہوں نے اس سال جولائی کے آخر میں اپنے قریبی دوستوں اور خاندان کے افراد کی موجودگی میں ایک چھوٹی سی تقریب میں شادی کی۔ اس شادی کے بعد لوگوں کی توجہ ان کی نجی زندگی کی طرف مزید مبذول ہو گئی۔

روبرٹو کارلوس کے مبینہ طور پر اسلام قبول کرنے کی خبریں اس وقت پوری دنیا میں پھیلیں جب ترکی کی حکمران جماعت کے ایک رکن پارلیمنٹ علی شاہین نے سوشل میڈیا پلیٹ فارم ’ایکس‘ پر اس حوالے سے تفصیلات شیئر کیں۔

مزیدپڑھیں:ایک کروڑ روپے سے زائد کے لین دین پر ایف بی آر نے نیا ضابطہ نافذ کردیا

انہوں نے بتایا کہ جب وہ برازیل کے شہر ساؤ پاؤلو میں موجود تھے تو انہوں نے وہاں کی مسلم کمیونٹی کے نمائندوں اور شیخ جہاد حمادہ سے ملاقات کی۔

ترک رکن پارلیمنٹ کے مطابق شیخ جہاد حمادہ نے انہیں بتایا کہ روبرٹو کارلوس طویل عرصے سے ان کے رابطے میں تھے اور وہ چار ہفتے قبل ان سے ملنے آئے تھے جہاں انہوں نے کلمہ پڑھ کر اسلام قبول کیا۔


علی شاہین نے اس مبینہ فیصلے پر روبرٹو کارلوس کو مبارکباد بھی دی اور ان کے اور ان کے خاندان کے لیے نیک خواہشات کا اظہار کرتے ہوئے کہا کہ وہ ”امن، صحت اور برکت سے بھرپور زندگی“ گزاریں۔

واضح رہے کہ روبرٹو کارلوس فٹبال کی دنیا کے مشہور ترین دفاعی کھلاڑیوں میں شمار ہوتے ہیں۔ انہوں نے ریئل میڈرڈ کے ساتھ اپنے کیریئر میں بے شمار کامیابیاں حاصل کیں اور برازیل کی قومی ٹیم کی جانب سے بھی طویل عرصے تک کھیلتے رہے۔ وہ ترکی کے معروف کلب فنرباحچے کے لیے بھی کھیل چکے ہیں۔

اپنی تیز رفتاری، طاقتور شاٹس اور دفاعی کھیل کی وجہ سے روبرٹو کارلوس نے دنیا بھر میں کروڑوں فٹبال شائقین کے دلوں میں جگہ بنائی۔ آج بھی انہیں فٹبال کی تاریخ کے بہترین لیفٹ بیک کھلاڑیوں میں شمار کیا جاتا ہے۔

روبرٹو کارلوس کے اسلام قبول کرنے کی خبر مختلف ذرائع سے سامنے آ رہی ہے، لیکن چونکہ روبرٹو کارلوس نے خود اس کی تصدیق نہیں کی، اس لیے اس خبر کو فی الحال ایک دعویٰ ہی سمجھا جا رہا ہے۔ اگر سابق برازیلین اسٹار کی جانب سے باضابطہ بیان سامنے آتا ہے تو ہی اس معاملے کی اصل حقیقت مکمل طور پر واضح ہوسکے گی۔

تازہ ترین
سعدیہ امام کا ساتھی اداکاروں کی جانب سے دھوکا دیے جانے کا انکشاف
بھائی کا کتاب میں شہزادی ڈیانا کی موت کی ’حقیقت‘ سامنے لانے کا اعلان
پاکستانی طلبا کے لیے ‘جیمنائی پلس’ کی مفت سبسکرپشن حاصل کرنے کا آسان طریقہ
نئی جگہ پر نیند کیوں نہیں آتی؟ دلچسپ وجہ جانیں
رجب بٹ فلمی دنیا میں قدم رکھنے کو تیار، ہیروئن کون ہوں گی؟
جمال موسیالا ایک بار پھر میچ کے دوران گر پڑے، اعصابی عارضے کی تشخیص
طلاق کے بعد بھی سابق شوہر سے اچھے تعلقات، نازلی نصر نے وجہ بتا دی
ایران کا دنیا کا سب سے بڑا سولر پلانٹ بنانے کا منصوبہ، چین اور بھارت بھی پیچھے رہ جائیں گے